UiO-rektor gler seg over 1,3 milliardar til Livsvitskapsbygget og Vikingtidsmuseet

Livsvitskapsbygget får ei tildeling på 948 millionar kroner medan nytt vikingtidsmuseum får 378 millionar i forslaget til statsbudsjett for 2022. Rektor Svein Stølen er strålande nøgd.

Ein mann med briller står og held eit føredrag

GLAD REKTOR: UiO-rektor Svein Stølen gler seg over pengedryss til Livsvitskapsbygget og nytt vikingtidsmuseum på Bygdøy i regjeringa Solbergs forslag til statsbudsjett for 2022. Her held han foredrag om UiO på Lillestrøm der han i dag deltar på Lillestrømkonferansen. (Arkivfoto)

Foto: Martin Toft

I dag blei det klart at regjeringa føreslår ei løyving på 948 millionar kroner ekstra til Livsvitskapsbygget i Gaustadbekkdalen. Det er ein del av det ekstra bidraget på til saman fem milliardar kroner som denne forskingsbygningen vil kosta etter utvidinga som blei sett i gang etter at det i sommar blei klart at Klinikk for laboratoriemedisin på Oslo universitetssykehus også skal inn i bygningen.

Når den 97 000 kvadratmeter bygningen står ferdig i 2027, skal prislappen til saman koma på 11,6 milliardar kroner.

– Me kan gleda oss over desse milliardane til Livsvitskapsbygget som me no skal etablera saman med OUS, seier UiO-rektor Svein Stølen i ein telefonsamtale med Uniforum, medan han er på veg til Lillestrøm-konferansen.

Han er overtydd om at Livsvitskapsbygningen ikkje berre får mykje å seia for for forskinga ved UIO og OUS, men også nasjonalt når den er ferdig.

– Der skal det utførast verdsleiande grunnleggjande forsking som skal takast i bruk. Det blir hjartet i Oslo Science City i samarbeid med Oslo Universitetssykehus og Helse Søraust, slår han fast.

Gler seg

Men også eit anna forslag i statsbudsjettet for 2022 er han svært nøgd med. Det er framlegget om å løyva 378 millionar kroner til bygginga av nytt vikingtidsmuseum på Bygdøy.

– Det gler me oss sjølvsagt også over, sjølv om det også finst nokre utfordringar i budsjettet.

– Kva tenkjer du på då?

– Avbyråkratiserings- og effektiviseringsreforma (ABE-reforma), svarar UiO sin rektor.

– Men akkurat no er det viktig å trekkja fram korleis forskinga på livsvitskap vil koma inn i eit nytt bygg som vil vera viktig både for UiO og for Noreg, men også for heile det norske helsevesenet, understrekar Svein Stølen overfor Uniforum.

Glad Henrik Asheim

Forskings- og høgare utdanningsminister Henrik Asheim deler begeistringa til UiO-rektor Svein Stølen.

– Eg er glad for at me har fått på plass dei store byggjeprosjekta som til dømes Livsvitskapsbygget og Vikingtidsmuseet ved Universitetet i Oslo. Dei kjem til å verta viktige bautaer, og derfor må me ha fortgang i prosessen, seier Henrik Asheim til Uniforum i Vandrehallen i Stortinget.

Når det gjeld Vikingskipshuset på Bygdøy seier han seg lei for at dørene no er stengde.

– Det er dumt for alle at det er stengt akkurat no, men me gler oss alle til å sjå det nye museet, seier Henrik Asheim.

I to dagar til skal han vera forskings- og høgare utdanningsminister. Men torsdag er det slutt. Då skal han overrekkja nøkkelen til etterfylgjaren sin.

– Det veit eg enno ikkje kven blir, så det er litt rart, tykkjer han.

• Les meir om Livsvitskapsbygget i Uniforum:

Milliardsprekk for Livsvitenskapsbygget - trolig ikke ferdig før i 2027

Helse Sør-Øst gir grønt lys: Oslo universitetssykehus får lokaler i Livsvitenskapsbygget

Regjeringa vil at UiO og Oslo universitetssjukehus skal dela Livsvitskapsbygget

Livsvitenskapsbygget: Universitetsstyret vurderer partnerskap med OUS som beste løsning

OUS kan overta 20 prosent av Livsvitenskapsbygget

"Usannsynlig" med ekstra milliard til Livsvitenskapsbygget

Livsvitskapsbygget: Statsbyggs kuttforslag er uaksepable for UiO

Partnarskap med Oslo universitetssykehus kan bli løysinga for Livsvitskapsbygget

UiO vil be regjeringa om 1 milliard ekstra til Livsvitskapsbygget

Livsvitenskapsbygget: – Mer kvikkleire enn undersøkelsene viste