Ingen studentkjellarar eller pubar blir opna på UiO

Byrådet i Oslo har bestemt at alle serveringsstader skal stengjast frå natt til tysdag.  Dermed blir heller ikkje studentkjellarar og pubar på universitetsområda  opna igjen 1. mars. 

Ein mann med munnbind står framfor eit lite bord

AV MED MUNNBINDET: Byrådsleiar Raymond Johansen tar av seg munnbindet før han kunngjer nye strenge koronatiltak i  Oslo. (Skjermdump frå Oslo kommune)

Torsdag 25. februar kunngjorde UiO at studentkjellarar og pubar skulle opna igjen frå 1. mars.  Samtidig skulle det også kunne planleggjast for fysisk undervisning i små grupper på maksimalt 20 personar. 

Etter auka spreiing i Oslo av smitte frå det britiske muterte koronaviruset, bestemte byrådet i Oslo i dag at alle serveringsstader i byen må halda stengt frå og med tysdag 2. mars og fram til 15. mars.  Dermed blir det berre tillate med utbringing av mat (take away).  Med unntak av daglegvarebutikkar, apotek og vinmonopolutsal, vert også alle forretningar stengde i hovudstaden frå tysdag. Også galleri og kunstutsal må stengja dørene.

Fysisk undervisning i små grupper går etter planen

For Universitetet i Oslo blir konsekvensen at studentkjellarar og pubar likevel ikkje kan planleggja å opna igjen, slik UiO-leiinga kom med melding om sist torsdag.  Men dei nye tiltaka i Oslo får ikkje konsekvensar for planen om å å opna for fysisk undervisning i smågrupper. Den undervisninga kan starta opp etter planen, går det fram av ei melding som universitetsdirektør Arne Benjaminsen har sendt ut til dekanarar, direktørar og leiarar for alle einingar på Universitetet i Oslo. 

Alle tilsette skal bruka heimekontor

Studentane har også tilgang til bibliotek, lesesalar og bygningar med kort og kode.  Universitetsdirektøren understrekar også at UiO held seg til Oslo kommune sitt påbod om at alle tilsette skal bruka heimekontor, så sant det er praktisk mogleg, sjølv om UiO er ope for tilsette.

Sidan alle serveringsstader i Oslo kommune må stengja, vil det seia at også kantinene og kafeane som Studentsamskipnaden i Oslo driv, må stengja  tysdag 2. mars og fram til og med 15. mars. Det får Uniforum også stadfesta av kommunikasjonsdirektør Nina Langeland i SiO.

– Så må me koma tilbake om det kan vera aktuelt å tilby take away utover Union Kringsjå framover, fortel ho. Det blir heller ikkje mange idrettsaktivitetar.

– Athletica stansar all utandørs gruppetrening frå i morgon, måndag. Me held fram med digitalt treningstilbod og medisinsk PT, og vurderer fortløpande ut frå kva som går, opplyser Nina Langeland i ein epost til Uniforum. 

(Oppdatert kl. 23:55 med kommentar frå Nina Langeland i SiO)

 

Emneord: Koronavirus, Koronaviruset, Studentforhold Av Martin Toft
Publisert 28. feb. 2021 20:56 - Sist endra 1. mars 2021 09:26
Legg til kommentar

Logg inn for å kommentere

Ikkje UiO- eller Feide-brukar?
Opprett ein WebID-brukar for å kommentere