På måndag kom byrådsleiar Raymond Johansen i Oslo med ei sterk oppfordring til alle studiestadene i hovudstaden om å innføra digital undervisning i alle situasjonar der det er mogleg. Han bad også om at flest mogleg arbeidsplassar skulle påby dei tilsette å jobba heimanfrå, så sant dei hadde høve til det for å unngå for tette folkesamlingar i kollektivtrafikken. Regjeringa fylgde seinnare på dagen opp med liknande tiltak nasjonalt og lokalt avhengig av smittesituasjonen.
Varslar innskjerpa tiltak på UiO
På UiO har leiinga i dagane etterpå arbeidd med å vurdera korleis dei skal setja i verk naudsynte koronatiltak for studentar og tilsette.
– Me har jobba vidare med heile organisasjonen. Målet vårt er at me skal unngå at Oslo kjem i den same situasjonen som andre europeiske storbyar, seier rektor Svein Stølen til Uniforum.
Han varslar derfor innskjerpa tiltak også på UiO frå torsdag 29. oktober klokka 12.00.
– Me skal leggja best mogleg til rette for digital undervisning på heile universitetet. Noko fysisk undervisning er viktig av læringsgrunnar og fagleg-sosiale og psykiske grunnar. Fakulteta vil varsla alle studentane om korleis det blir på dei ulike studieprogramma, fortel Svein Stølen.
Påbyr alle som kan om å jobba heimanfrå
Akkurat som etter statsminister Erna Solbergs pressekonferanse den 12. mars i år, vil også UiO påby alle tilsette som har høve til det å utføra arbeidsoppgåvene sine heimanfrå.
– Ja, me fylgjer opp påbodet om å bruka heimekontor, så lenge det er praktisk mogleg. Den næraste leiaren har ansvaret for i samråd med dei tilsette å vurdera kven som eventuelt må vera til stades for å sørga for å halda oppe forsking, undervisning og drift på Universitetet i Oslo, understrekar rektor Svein Stølen.
Må bruka munnbind der dei ikkje kan halda meteren
– Og på alle offentlege stader på universitetet der det ikkje er mogleg å halda ein minsteavstand på 1 meter, ber med tilsette og studentar om å bruka munnbind, legg han til.
Påbodet får også konsekvensar for møteverksemda på UiO.
– Dei må alle haldast digitalt, slår han fast.
Les også meir på koronasidene til UiO
Logg inn for å kommentere
Ikkje UiO- eller Feide-brukar?
Opprett ein WebID-brukar for å kommentere