Avviste klage frå Jon Sudbø

Forskaren Jon Sudbø må levera tilbake doktordiplomet sitt etter at han har tilstått forskingsfusk i fleire vitskaplege artiklar. Etter at det også er påvist klare feil i doktorarbeidet hans, stod Universitetsstyret i går fast på den tidlegare avgjerda om å kalla tilbake doktorgraden til Jon Sudbø.

STORE OVERSKRIFTER: Avsløringa av forskingsfusket til Jon Sudbø, vekte stor oppsikt i januar 2006.Han arbeidde då som overlege på Radiumhospitalet og førsteamanuensis II ved UiO.

Foto: Ståle Skogstad

Den tidlegare overlegen ved Radiumhospitalet og førsteamanuensis II ved UiO hadde klaga denne avgjerda inn for Universitetsstyret.

I vedtaket frå Universitetsstyret blir klagen avvist, fordi ein ser det som påvist at Jon Sudbø har manipulert med datagrunnlaget i dei tre første artiklane i doktoravhandlinga si. Ein ser det difor som dokumentert at det ligg føre fusk av vesentleg omfang i avhandlinga.

Klagen blei difor avvist fordi doktorgraden er tildelt på feil grunnlag og vedtaket om tildeling er ugyldig. I det endelege vedtaket heiter det at Universitetsstyret tar doktorgraden frå Jon Sudbø og ber universitetsdirektøren syta for at doktordiplomet blir innlevert.

Ingen auke i kopiprisen

Saka om oppfylginga av UiOs interne evaluering av Kvalitetsreforma blei utsett til eit seinare møte. Til glede for studentane, vedtok styret ikkje å heva prisane på kopiar, betaling av utskrifter, prisar på kompendium og kopisamlingar og prisen på kopieringsautomatar for studieåret 2007/2008. Prisane blir dermed dei same som for studieåret 2006/2007. Dei to studentrepresentantane fekk også med seg dei andre i styret på at alle framtidige endringar i kopiprisane skal leggjast fram for Studentparlamentet før det går vidare til universitetsdirektøren, som får fullmakt til å gjennomføra mindre prisjusteringar og andre endringar.