Svein Harald Milde har vendt tilbake til heimekontoret

Det var tysdag 3. november Uniforum først kunne fortelja om kommunikasjonsrådgjevar Svein Harald Milde på Psykologisk institutt som ikkje ville flytta på heimekontor før UiO kunne lova han ei ordentleg tilrettelegging. Han grunngav kravet med at han fekk store ryggproblem og var på nippet til å ta ut ei sjukemelding ein månad ut i den første tida med heimekontor. Då hadde arbeidet med ei berbar datamaskin på fanget sitjande i ein dårleg stol, gjort ryggsmertene uuthaldelege.

– Det var derfor eg gjekk på smertestillande i den perioden, seier han.  

• Les i Uniforum:

Svein Harald Milde nektar å jobba på heimekontor før UiO legg til rette for det

– Ikkje særleg praktisk

Denne veka møter Uniforums fotograf Svein Harald Milde heime i stova i huset på Veitvet. Milde er framleis ikkje nøgd med situasjonen.

– Eg har snakka med den næraste leiaren min og fått lovnad om at eg kan ta med meg både kontorstolen og dei to dataskjermane på kontoret, heim. UiO vil betala fraktkostnadene. For meg er det ikkje særleg praktisk å ha desse PC-skjermane heime for å jobba derifrå, spesielt ikkje på fredagar, seier Svein Harald Milde til Uniforum i ein telefonsamtale. Han viser til at han derfor har fått lov at den næraste leiaren sin til å vera på kontoret eit par dagar i veka når det er behov for det.

Blir på jobbkontoret kvar fredag

– Derfor har eg bestemt meg for å vera på kontoret på Psykologisk institutt kvar fredag for å laga nyhendebrevet til instituttet. Då er eg avhengig av to skjermar for å unngå at det blir alvorlege feil i nyhendebrevet.  Om eg berre hadde hatt ei berbar datamaskin til disposisjon for det arbeidet, er eg redd for at eg lettare ville ha gjort feil.  Eg kunne ha risikert at feil epost ville ha kome til, til dømes feil journalist, fortel han.

Mange vil seia at han kunne ha kopla til dei to skjermane til den berbare datamaskina heime. 

– IT-avdelinga har gitt meg beskjed om at eg helst ikkje bør gjera det, seier Svein Harald Milde. 

I Uniforum den 3. november peika han på at OsloMet har gått til innkjøp av utstyr til alle tilsette som må jobba frå heimekontor. Seinare viste også Khrono i ein artikkel nokre dagar seinare, at også Universitetet i Bergen kan tilby ei liknande ordning for sine tilsette.   

– Stå på krava

Svein Harald Milde angrar ikkje på at han stod på kravet om tilrettelegging i den første artikkelen i Uniforum. Og han ber andre om å gjera det same.

 – Ja, eg vil tilrå alle til å stå på krava, spesielt alle dei som har gjort ein liten hybel om til kontor. Sjølv fekk eg mange støtteerklæringar frå folk i både utdanningssektoren, frå UiO, frå Folkehelseinstituttet og frå andre institusjonar etter oppslaget i Uniforum, summerer han opp.   

Eit stort problem han trekkjer fram er at heile dagen blir arbeidstid.

– Folk klarer ikkje å skilja mellom arbeidstid og fritid. Nokon høyrer brått eit kling frå PC-en midt på natta og føler at dei må sjekka om det er ein viktig epost. Derfor står dei opp, før dei legg seg igjen, drar han fram som eit døme.

– Pliktoppfyllande heimekontorarbeidarar

Svein Harald Milde synest det er viktig at dei som styrer Universitetet i Oslo viser at dei set pris på innsatsen til dei tilsette.

– UiO-leiinga skal vera glade for dei pliktoppfyllande heimekontorarbeidarane sine. Derfor bør UiO aktivt støtta opp og sørgja for at det blir mogleg å få til meir tilrettelegging.  Nettopp derfor var det rett av meg å ta opp dette temaet i Uniforum, seier Svein Harald Milde.  

For han var det viktig å retta merksemda mot tilrettelegging og HMS på heimekontoret fordi han har registrert at det ikkje blei nemnt i overordna epostar frå fakultets- og UiO-leiinga.

– Der kom det berre påbod, pålegg og krav om å pella seg heim fortast mogleg, ikkje eit einaste avsnitt om høvet til å leggja arbeidsplassen til rette heime, konstaterer han. 

Svein Harald Milde trur det er fleire grunnar til at profesjonalisert, standardisert tilrettelegging av heimekontor sit langt inne hos UiO-leiinga. 

– Det midlertidige ved situasjonen er éin ting. Kostnadene noko anna, no som Livsvitskapsbygget berre balar på seg. Ein tredje bremsefaktor er at heimekontor blei sett på som eit privilegium, før pandemien endra samfunnet, meiner han. Han viser til at det tidlegare var mogleg å få lov av sjefen til å jobba heimanfrå dersom ein skulle få besøk av, til dømes handverkarar, heime.

– No er dei livredde for å mista kontora eller arbeidsmiljøet, og for at heimekontor skal bli standarden, trur han.

– Handlar om å profesjonalisera heimekontoret

Og når 2021 kanskje også kan bli lik 2020,  er Svein Harald Milde overtydd om at det ikkje lenger berre blir midlertidig.

– Det handlar om å profesjonalisera heimekontoret, rigga oss til å bli operative både heime og på arbeidsplassen og vera ein smule serviceinnstilt overfor sine eigne arbeidstakarar, som trass alt er ein verdifull ressurs, slår han fast.

NTL-leiar: – Skal ha ein forsvarleg HMS-situasjon

Uniforum har også tatt kontakt med Natalia Zubillaga, leiar for Norsk Tenestemannslag på UiO for å høyra kva ho som tillitsvald meiner UIO-leiinga bør gjera for å leggja til rette for heimekontor og for å passa på at dei er i samsvar med HMS-reglane.

 

Skal ikkje vera ei varig ordning

På spørsmål om ho trur at det er rett at UiO-leiinga er livredde for å mista kontor og arbeidsmiljøet slik at heimekontor blir standarden, viser Natalia Zubillaga til at det er den tilsette som først skal spørja om det er høve til å bruka heimekontor.  

– Opplever at folk vil tilbake

– UiO vil ha fleksibilitet og gode løysingar

Uniforum har også tatt opp problema Svein Harald Milde opplever med å ha heimekontor med personaldirektør Irene Sandlie. I ein epost svarar ho at UiO ynskjer å ha ​fleksible og gode løysingar for heimekontor. 

– UiO er opptatt av å ha ein god personalpolitikk som skapar fleksibilitet og gode løysingar for heimekontor. Me legg til grunn at leiar og den enkelte medarbeidar gjennom dialog finn desse løysingane, understrekar ho.

Irene Sandlie rår også dei tilsette til å ta kontakt med den næraste leiaren for å fortelja kva dei treng, om dei må jobba heime. 

–Tilsette som har behov for ergonomisk utstyr eller ekstra IT-utstyr til heimekontor, avtalar dette med næraste leiar  etter ei individuell vurdering av behovet. Me legg også til rette for at tilsette kan låna med seg utstyr. Der det ikkje er mogleg for tilsette å henta utstyr sjølve, kan UiO bistå med heimlevering, peikar ho på. 

UiO kan dekkja utstyr

Og ho minner om at UiO i enkelte tilfelle også kan betala for utgifter til utstyr. 

– UiO dekkjer utstyr føresett at innkjøp er avtalt med leiar i forkant, og det ikkje let seg gjera å låna tilsvarande frå UiO. Me vil løpande vurdera om retningslinjene bør bli justerte basert på organisasjonen sitt behov og kva situasjonen krev, slik me har gjort gjennom heile perioden, understrekar personaldirektør Irene Sandlie. 

Les meir om heimekontor på UiOs nettsider