Norum i ordkrig med USAs helseminister

-USA set helsa til millionar av ungdomar på spel ved ikkje å gjera noko med fedmeepidemien av omsyn til sukkerlobbyen. Det skriv medisinprofessor Kaare R. Norum, UiO i eit brev til USAs helseminister Tommy Thompson, melder den britiske avisa The Observer.

PÅ KRIGSSTIEN: Professor i ernæring, Kaare R. Norum er på krigsstien mot USAs helseminister og sukkerindustrien.

Foto: Trine Nickelsen

Han uttrykkjer stor vreide over at USA ikkje vil støtta Verdas helseorganisasjon sin kamp mot overvekt. UiO-professoren leiar også ein komité som Verdas helseorganisasjon har sett ned som skal sjå på korleis det skal gå an å få ned talet på livsstilssjukdomar som diabetes, overvekt og hjarte- og karsjukdomar.

- Heilt sidan 1990 har USAs skiftande regjeringar blokkert WHOs varsel om handling mot denne verdsomfattande epidemien, seier Norum til avisa.