Bjarne Rogan vil bli HF-dekan

Professor Bjarne Rogan ved Institutt for kulturstudiar er kandidat til vervet som ny HF-dekan etter Even Hovdhaugen. Han er foreslått av blant andre tidlegare dekan Bjarne Hodne. Dekanvalet skal haldast 11. november.

DEKANKANDIDAT: Professor Bjarne Rogan stiller som kandidat til dekanvervet ved HF-fakultetet. (Foto: HF-fakultetet)

I valprogrammet sitt understrekar Bjarne Rogan at han vil vidareføra arbeidet med dei omfattande utdanningsreformene som det noverande dekanatet ved HF har sett i gang.

- Dette arbeidet stiller eg meg solidarisk med og ynskjer å føra vidare på ein best mogleg måte. Eg er overtydd om at studiereforma vil bidra til å skapa naudsynt fornying for mange fag, både når det gjeld undervisningsform og det faglege innhaldet, skriv Rogan. Han har plukka ut medieprofessor Trine Syvertsen og historieprofessor Tor Egil Førland som prorektorkandidatar for høvesvis forsking og utdanning.

Hovudoppgåvene for dette dekanatet blir å setja i verk ny gradsstruktur, modulisering av studieprogram og igangsetjing av den nye økonomimodellen. Rogan ynskjer også å arbeida vidare med HFs etter- og vidareutdanningspolitikk. Dessutan vil han justera forskarutdanninga med mål om å få fleire doktorandar gjennom, samtidig som han vil leggja til rette for ein debatt om forskingspolitikken til fakultetet.

- Det skal vera rom for fleirfaglege så vel som individuelle prosjekt, skriv Rogan i valprogrammet sitt.
Siste frist for å melda på kandidatar til dekanvalet er sett til 14. oktober.