– Eg er veldig, veldig glad, seier Christine Meklenborg Nilsen kort tid etter at valresultatet er klart og leiaren for valstyret ved HF Karen Gammelgaard har kunngjort at ho vann dekanvalet. Det skjedde klokka 14.00 i ettermiddag.
Christine Meklenborg Nilsen vann med 57,7 prosent av stemmene medan motkandidaten, historieprofessor Eirinn Larsen fekk 42,26 prosent. Begge kandidatane fekk blomster og takk frå leiaren for valstyret Karen Gammelgaard.
Slik stemte dei tilsette og studentane på HF:
Valoppslutnad:
Studentar: 7,05 prosent
Tilsette: 59,76 prosent
Stemmefordeling:
Christine Meklenborg Nilsen
Studentar: 44,31 prosent (187 stemmer)
Tilsette: 62,21 prosent (298 stemmer)
Total: 57,74 prosent
Eirinn Larsen:
Studentar: 55,69 prosent (235 stemmer)
Tilsette: 37,79 prosent (181 stemmer)
Total: 42,26 prosent.
(Kjelde: valstyret ved Det humanistiske fakultetet)
I sigerstalen sin takka Christine Meklenborg Nilsen alle.
– Tusen takk for tiliten Og tusen takk til alle som har stemt. Det er så viktig for universitetsdemokratiet at folk brukar stemmeretten sin, sa ho.
Og så vende ho seg mot Eirinn Larsen som stilte opp som motkandidat i dekanvalet på Det humanistiske fakultetet.
– Takk for ein fin valkamp. Når me får valkampar og når me får debattar, så skjerpar me oss og me får diskutert dei store tinga og dei vanskelege spørsmåla. Og eg meiner me er betre førebudde no, enn det me var for seks veker sidan, sa ho.
– Eg ser fram til eit godt samarbeid med det andre laget også etter valet, understreka ho til slutt.
Glad for høg valoppslutnad
I ein samtale med Uniforum er ho svært nøgd med å ha vunne dekanvalet på HF.
– Eg er svært glad for at det var ein så stor valoppslutnad blant både dei tilsette og studentane, seier ho.
No ser ho fram til å jobba saman med alle på Det humanistiske fakultetet.
– Eg vil også prøva å jobba for at me skal skapa møteplassar mellom studentane og leiinga på fakultetet, legg ho til.
Overtar etter Frode Helland etter nyttår
Med på dekanlaget sitt har Christine Meklenborg Nilsen John McNicol som prodekan for studium og utdanning og Aasta Marie Bjorvand Bjørkøy som prodekankandidat for forsking for forskarutdanning.
– Det er ingen andre eg heller ville vinna dette valet med enn John og Aasta, seier ho til Uniforum.
Den 1. januar vil Christine Meklenborg Nilsen overta som dekan på Det humanistiske fakultetet etter Frode Helland. Då vil han ha sete i vervet i åtte år.
(Saka blei oppdatert klokka 15.19)
Les meir i Uniforum:
Dekankandidat Christine Meklenborg Nilsen: - Jeg er en fighter
Dekanvalgene på HF og TF kan bli avgjort ved loddtrekning
Derfor lanserte Eirinn Larsen sitt kandidatur i siste minutt
Logg inn for å kommentere