Skal samla kunnskapen om Latin-Amerika

Det var i midten av april i år Uniforum kunne melda at Utanriksdepartementet arbeidde for å etablera eit eige kunnskapssenter om Latin-Amerika. Initiativet kom etter eit innspel frå ei arbeidsgruppe sett ned av utviklingsminister Erik Solheim. Det meinte at det burde etablerast eit eige Latin-Amerikainstitutt i Noreg. Etter dette utspelet sette Utanriksdepartementet og Kunnskapsdepartementet ned ei hurtigarbeidande arbeidsgruppe som skulle vurdera ulike organisasjonsformer for å styrkja og samla kunnskapen om Latin-Amerika i Noreg.

227 arbeider med Latin-Amerika

Gruppa har kartlagt heile det nasjonale kunnskapsmiljøet på Latin-Amerika og funne 227 forskarar, stipendiatar og andre som i større eller mindre grad arbeider med Latin-Amerika eller samarbeider med forskingsmiljø i området.

Universitetet i Oslo og Universitetet i Bergen stiller klart sterkast, med høvesvis 74 og 97 forskarar som arbeider med latinamerikanske problemstillingar. Men både NTNU, Universitetet i Tromsø, Universitetet for miljø- og biovitskap, Høgskulen i Oslo, Noregs handelshøgskule, Høgskulen i Bergen og Høgskulen i Telemark har forskarar som held på med prosjekt i regionen.

Oppdraget til arbeidsgruppa var altså å koma fram til ein modell som kunne knyta all forsking og all kompetanse på Latin-Amerika saman. Difor har arbeidsgruppa vurdert fire ulike modellar: eit nasjonalt nettverk, temabaserte regionale nettverk, regionale, institusjonsbaserte nettverk og eit nasjonalt institutt.

Lettare tilgang til Latin-Amerikaekspertisen

Etter å ha gått grundig gjennom kvar modell, tilrår gruppa altså at det blir oppretta eit nasjonalt nettverk. Det vil løysa oppgåva om å danna ei langsiktig kompetansebygging gjennom undervisning og grunnforsking. Dessutan vil ein slik modell også kunna organisera ei kortsiktig kompetansebygging ved å gjera dagens forskarar betre og gjera fleire forskarar gode på Latin-Amerika.

Eit anna viktig mål som blir oppfylt, er at det blir lettare for staten, næringslivet og andre samfunnsinstitusjonar å få tilgang til den norske ekspertisen på Latin-Amerika.

Styrking av dei eksisterande universitetsmiljøa krev langsiktige investeringar, meiner arbeidsgruppa, som samtidig slår fast at rekrutteringssituasjonen for Latin-Amerikastudiar er svært god, fordi studentar viser stor interesse..

Når medlemane i arbeidsgruppa rår til at det blir etablert eit nasjonalt nettverk, så er ein av grunnane til det at dei meiner at det i større grad enn i dag vil gi Latin-Amerikaforskarar høve til felles møteplassar som seminar og kurs.

Etter deira meining, skal det nasjonale nettverket ha ein koordinator og ei administrativ stilling eller ein informasjonsmedarbeidar. Det skal også knytast ein eigen nettportal til det nasjonale nettverket for Latin-Amerikakunnskap. Det vil gjera forskarmiljøet kjent for alle interesserte og til saman gi ein fast årleg lønnskostnad på 1,4 millionar kroner.

Forskings- og utvekslingsprogram

Uavhengig av dei ulike modellane må det opprettast både eit forskingsprogram og eit utvekslingsprogram avgrensa til Latin-Amerika, foreslår arbeidsgruppa.

Forskingsprogrammet skal administrerast av Noregs forskingsråd, medan utvekslingsprogrammet kan administrerast av Utanriksdepartementet, Kunnskapsdepartementet eller Noregs forskingsråd.

Medan forskingsprogrammet bør ha eit årleg budsjett på 10 millionar kroner, skal utvekslingsprogrammet ha ein pott på 3-5 millionar kroner over fem år. Det skal også innehalda eit utvekslingsprogram for gjesteprofessorat, slik at ein latinamerikansk forskar med godt ord på seg kan koma til Noreg for å forska og undervisa. I tillegg bør eit slikt utvekslingsprogram innehalda eit stipendprogram/masterprogram for å oppmuntra til meir forsking på dette feltet.

Arbeidsgruppa har vore sett saman av to representantar frå forskingsmiljøa ved Universitetet i Oslo og Universitetet i Bergen, ein representant frå StatoilHydro og ein innleigd konsulent frå selskapet Agenda Utredning & Utvikling som har leidd og organisert arbeidet og utforma rapporten.

Utanriksdepartementet har gitt høyringsinstansane frist til 20. august med å koma med sine innspel til rapporten. Den endelege rapporten blir lagt fram 15. september.