Psykologi satsar på høgteknologisk hjerneforsking

I april skal den nye MR-skannaren vera i drift på Intervensjonsenteret på Rikshospitalet. Medan skannaren kostar 18 millionar kroner i innkjøp, vil byggjekostnadane koma på rundt åtte millionar kroner. Tidlegare har både UiO og Forskingsrådet løyvd åtte millionar kroner til prosjektet, medan Rikshospitalet dekkar resten.

I går var både Åge Danielsen, som er administrerande direktør for Radiumhospitalet-Rikshospitalet, SV-dekan Asbjørn Rødseth, instituttleiar Fanny Duckert og førsteamanuensis Tor Endestad ved Psykologisk instittutt, dagleg leiar Frode Vartdal ved Fakultetsdivisjonen på Radiumhospitalet-Rikshospitalet og avdelingsleiar Erik Fosse til stades då kontrakten mellom samarbeidspartnarane blei underskriven på MR-rommet på Intervensjonssenteret. Avdelingsleiar Erik Fosse på Intervensjonssenteret er full av entusiasme for prosjektet.

Fokusert ultralyd

- Stamcelleforskinga gjer det mogleg å dyrka nytt vev og nye celler. MR-teknologien kan overvaka denne behandlinga. Den gjer det også mogleg å overvaka destruksjon av kreftsvulstar med såkalla fokusert ultralyd. Dei nye teknologiane både i biletbehandling og i pasientbehandling flyttar forståinga vår av sjukdom frå eit makroanatomisk til eit mikroanatomisk nivå. Det vil seia at det vil vera mogleg å gå inn på kvar einskild celle i kroppen, trur Fosse.

Stort framsteg

Også førsteamanuensis Tor Endestad ved Psykologisk institutt har stor tru på at samarbeidet om MR-skannaren kan gi psykologane ny innsikt i dei ulike funksjonane i hjernen.

- Det vil vera eit stort framsteg for forskinga på minnet og på gløymsla. Me vil ha høve til å finna ut meir om kontrollen av fokus. Til dømes kan me forska på kva som får oss til å halda i gang ein samtale med kvarandre. Dessutan skal me sjå på anatomien til hjernen og kopla det saman med korleis nervecellene heng saman i hjernen, fortel Endestad. Han leier ei stor forskargruppe som konsentrerer seg om hjerneforskinga på Psykologisk institutt. Gruppa er på fire forskarar, to stipendiatar og fem masterstudentar.

- Når det gjeld samarbeidet med kreftforskarane, kan me vera med på å avgjera om ein svulst er så nær språkområdet i hjernen at det vil bli skada om den blir fjerna, fortel Endestad. Og Fosse understrekar ein stor fordel med den nye skannaren.

- I den nye MR-skannaren vil det ikkje vera behov for å ha pasientane inne i den i så lang tid som i dag. No er det mange pasientar som utviklar klaustrofobi mot opphaldet i skannaren. Det vil me oppleva i mindre grad med den nye. Dagens skanner er ti år gamal. Ideelt sett burde alle MR-skannarar bli skifta ut kvart femte år, om det hadde vore pengar til det, meiner han.