Rappa velkomst for kronprins Haakon

Kronprins Haakon blei helsa med rapp frå Emir Mulaosmanovic då han besøkte bua til forskingsprosjektet Kulturell kompleksitet (CULCOM) på Forskingstorget fredag 22. september.

RAPPA VELKOMST: Emir Mulaosanovic ynskte kronprins Haakon velkomen med å rappa ein song for han på Forskingstorget.
Foto: Yngve Vogt

- Eg rappa ein song til han om ein som syng at han vil bruka vald, medan den andre syng tilbake at han ikkje vil ha noko å tena på det. Eigentleg er teksten ganske grov, men eg gjorde den litt meir passande for ein kongeleg person, seier Emir Mulaosmanovic til Uniforum. Han er vokalist i rappgruppa Minoritet1 som har medlemar med ulik etnisk bakgrunn.

Musikkforskarane Jan Sverre Knudsen og Stan Hawkins har forska på gruppa og meiner at Minoritet1 skapar musikk og tekstar som engasjerer. Når dei står på scena rappar dei på norsk om Oslo-kvardagen sin. Fredag formiddag stilte gruppa også opp på Paviljongen på Forskingstorget.

Over 50 forskingsmiljø frå Oslo og Akershus har eigne utstillingstelt på Forskingstorget på Universitetsplassen. Dei mest langvegsfarande gjestene er fleire tilsette frå Universitat Rovira i Virgili (URV) i Katalonia i Spania. Dei besøkjer Forskingstorget med ei holebuarutstilling. Fredag formiddag var det lengst kø framfor traileren til det multinasjonale selskapet GE Healthcare. Der viser dei nemleg fram ein hjartesimulator. Kunnskapsminister Øystein Djupedal opna Forskingstorget klokka 11.30 fredag 22. september. .
Forskingstorget held på til og med laurdag 23. september.

Emneord: Forskningsformidling Av Martin Toft
Publisert 22. sep. 2006 13:32 - Sist endra 10. des. 2008 15:42
Legg til kommentar

Logg inn for å kommentere

Ikkje UiO- eller Feide-brukar?
Opprett ein WebID-brukar for å kommentere