Dei åtte tilsette i forskargruppa til professor Hartmut Luecke ved Norsk senter for molekylærmedisin (NCMM) har måtta flytta ut av dei nyinnflytta lokala i 2. høgda i Kristine Bonnevies hus etter funn av asbest. Det skjer rundt to månader etter at dei flytta dit frå dei tidlegare lokala i Forskningsparken.
Dette er Norsk senter for molekylærmedisin:
- eit nasjonalt forskingssenter som skal fungera som eit drivhus for unge, talentfulle forskarar i molekylærmedisin, bioteknologi og translasjonsforsking. Senteret er eit viktig element i UiOs strategiske satsing på livsvitskap.
- direktør: Janna Saarela
- senteret har 70 tilsette.
Aktuelt: 8 av dei tilsette flytta ut av Forskingsparken i januar, medan 20 andre måtte flytta til andre lokale i Forsknings-parken på grunn av ombygging.
Dei 8 som flytta til Kristine Bonnevies hus møtte fleire manglar i dei nye lokala.
Funn av asbeststøv i dei nye lokala har ført til at ingen lenger har tilgang til desse lokala. Dei kan først venda tilbake 12. april.
(Kjelder: UiO, Uniforum og NCMM)
Senterdirektør Janna Saarela har fått beskjed om at alle i Luecke-gruppa må halda seg på heimekontora sine på grunn av asbestfunn i dei nyninnflytta lokala i andre høgda i Kristine Bonnevies hus.
– Det er oppdaga asbest i støvprøvar henta frå golvet i nokre av romma i Kristine Bonnevies hus som er blitt renoverte. Luftprøvar frå alle romma der forskargruppa held til blei målte den 18. mars, og dei var under det tilrådde nivået til Folkehelseinstituttet, fortel ho.
– Korleis er situasjonen for dei som held til der no?
– Alle dei renoverte laboratoria og kontora i bygningen er blitt stengde og dei er i ferd med å bli gjennomvaska. Romma vil vera stengde heilt til me har fått negative testresultat etter vaskinga.
Janna Saarela beklagar det som har skjedd.
– Dette er svært uheldig og eg er svært lei meg for den forseinkinga dei opplever. Det var ikkje noko me kunne sjå føre oss. Vaskinga har begynt og me reknar med at romma skal vera klare til bruk igjen frå 12. april.
Får utvida kontraktane sine
No lovar ho også å få til ei ordning som gjer at dei mellombels tilsette forskarane skal få utvida forskingstida si.
– Forskargruppa vil bli finansielt kompensert for 3 månader for at det skal vera mogleg å utvida kontraktane til både doktorgradsstudentane og postdoktorane som har fått forseinka prosjekta sine.
– Dei tilsette fortalte leiinga for senteret om moglege funn av asbest kort tid etter at dei hadde flytta inn i Kristine Bonnevies hus. Kvifor høyrde du ikkje på dei då?
– Dei rapporterte om at dei hadde sett støv i nokre av romma som hadde blitt renoverte. Me kunne ikkje føresjå at det var støv som inneheld asbest, men me blei einige med gruppa i at me ville gjennomføra ei uavhengig undersøking av alle romma etter at prosjektet var avslutta. Det blei gjort den 18. mars, fortel Janna Saarela til Uniforum.
Dette er asbest:
Eit fintråda bøyeleg mineral som anten er ein variant av mineralet amfibol(hornblendeasbest) eller serpentin (krystotil). Mineralet er blitt brukt i måling og sementvarer som asbestsement og eternitt. Også bremseband og bremseklossar for bilar har tidlegare innehalde asbest. Asbest finst også i form som asbestull og asbestpapp til isolasjon av dampkjelar og omnar.
Fordi innanding av asbeststøv er helsefarleg, har mange land innført restriksjonar i samband med bruken av stoffet. I Noreg blei bruken av asbest forbode i 1985 på grunn av sterk fare for utvikling av lungekreft og brysthinnekreft.
Etter andre verdskrigen og fram til første delen av 1970-åra blei verdsproduksjonen tidobla. I 1973 blei det produsert 4 millionar tonn.
Fjerning av byggjematerialar med asbest frå eldre bygningar under restaurering skal gå føre seg med verneutstyr, og det som skal fjernast skal vera innpakka i tett plast.
(Kjelder: Store norske leksikon og Wikipedia)
– Kjem de til å kontakta Eining for helse, miljø, sikring og beredskap (HMSB) ved UiO for at det skal bli sett i gang naudsynte tiltak for å løysa problemet og forsikra om at romma blir sikre igjen?
– Me har kontakta Eigedomavdelinga som er ansvarleg for ombyggingsprosjektet, og HMSB-eininga for å vurdera moglege risikofaktorar. Eigedomsavdelinga stengde straks alle romma og på alle romma til gruppa har dei tatt i bruk eit selskap som har spesialisert seg på asbestsanering, og det blir gjennomført ei tilleggstesting av Mycoteam før romma kan opnast for bruk igjen, fortel ho.
Nøgd med samarbeidet med Eigedomsavdelinga og fakulteta
Janna Saarela gjentar at romma er forventa å kunna brukast igjen frå 12. april når dei er ferdig gjennomvaska og testa på nytt. Ho er nøgd med samarbeidet med Eigedomsavdelinga, Det medisinske fakultetet og Det matematisk-naturvitskaplege fakultetet.
– Saman med Eigedomsavdelinga, Institutt for biovitskap og leiinga for dei to involverte fakulteta, har me laga ein plan for gjennomvasking, testing og frigjering av romma til bruk. Det inkluderer tiltak som skal hindra framtidig utslepp av asbest. Samarbeidet mellom fakulteta og Eigedomsavdelinga har vore effektivt og hurtig utan forseinkingar, forsikrar direktør Janna Saarela ved Norsk senter for molekylærmedisin.
– Behov for gjennomgang av prosedyrane
Universitetsdirektør Arne Benjaminsen ved UiO har også fått rapport om konsekvensane av asbestfunnet i dei ombygde lokala til Luecke-gruppa i Kristine Bonnevies hus. Han er klar på at handteringa av saka vil få fylgjer for rutinane.
– Denne leie saka har vist oss at det er behov for ein gjennomgang av prosedyrane. Det gjeld både å tydeliggjera roller og ansvar, å sørgja for at også alle eksternt involverte er godt kjente med prosedyrane, og å vurdera om det er behov for enkelte presiseringar og oppdateringar. Me vil derfor setja ned ei arbeidsgruppe som skal sjå på dette, opplyser Arne Benjaminsen i ein epost til Uniforum.
– Tett og god dialog
• Les også om forskarane som måtte flytta ut av nyinnflytta lokale:
Asbestfunn gjorde at forskargruppe måtte ut av nyinnflytta lokale
Logg inn for å kommentere
Ikkje UiO- eller Feide-brukar?
Opprett ein WebID-brukar for å kommentere