UiO har skifta slagord

Universitetet i Oslo reklamerer ikkje lenger med ”Norges ledende universitet”, men med ”et ledende europeisk universitet” på nettstaden sin.  – Koplinga til strategiplanen ligg bak skiftet, seier rektor Ole Petter Ottersen til Uniforum.

NO: UiO har fått nytt slagord på nettstaden sin. Det er: "Bli student ved UiO - et ledende europeisk universitet".

Foto: Skjermdump frå uio.no

Det var i førre veke Uniforum kunne melda at andre universitetsrektorar reagerte svært sterkt på at UiO reklamerte på nettsidene sine med slagordet ”Bli student på Norges ledende universitet.”

– Uverdig

Rektor ved Universitetet for miljø og biovitskap (UMB), Knut Hove reagerte sterkast.

– Etter mi meining startar UiO då på ein vulgærmarknadsføringskonkurranse som er uverdig det eldste universitetet vårt , og som ikkje byggjer opp respekt for akademiske verdiar, sa Hove til Uniforum.

Også rektor Jarle Aarbakke ved Universitet i Tromsø, prorektor for forsking ved NTNU, Kari Melby og rektor Torunn Lauvdal ved Universitetet i Agder reagerte på marknadsføringa til UiO.

Rektor Ole Petter Ottersen forstod at slagordet kunne verka litt provoserande på dei andre rektorane, sidan UiO ikkje er best på alle område.

 

FØR:  Då dei nye nettsidene blei lanserte, reklamerte UiO med: "Bli student ved Norges ledende universitet." (Foto: Skjermdump frå uio.no)

– Men det må vera lov å peika på institusjonen sin generelle styrke. Altså at me i marknadsføringa vår kan nytta generelle uttrykk som dekkjer over det som er typisk for universitetet, sa Ottersen i ein kommentar til Uniforum.

Under kommentarfeltet til artikkelen strøymde det inn innlegg til støtte for at UiO skulle stå fast på at det er ”Norges ledende universitet.”

– Ikkje omstridd

No har altså Universitetet i Oslo endra slagordet på nettsidene sine til ”et ledende europeisk universitet”. Rektor Ole Petter Ottersen trur ikkje det blir omstridd.

– Eg trur ikkje det er omstridd at me er eit leiande europeisk universitet – på Shanghai-rankinga er me vel nummer 18 av fleire hundre europeiske universitet.

– Vil det nye slagordet passa betre inn i UiOs mål om å bli eit europeisk toppuniversitet?

– Ja, det er nettopp koplinga til strategiplanen som ligg bak skiftet.

– Reknar du med reaksjonar frå dei andre universitetsrektorane på det nye slagordet også?

– Nei!

Emneord: Rangering, Informasjonsavdelinga Av Martin Toft
Publisert 29. juni 2010 14:41 - Sist endra 29. juni 2010 15:06
Legg til kommentar

Logg inn for å kommentere

Ikkje UiO- eller Feide-brukar?
Opprett ein WebID-brukar for å kommentere