Protesterer mot at UiO kan trekkja seg ut av Caen

Det vil vera til stor skade for samarbeidet mellom Noreg og Frankrike om UiO trekkjer seg ut av Studiesenteret i Caen, slik eit utval nedsett av universitetsleiinga går inn for. Det meiner eit nesten samla fagmiljø i fransk, som vil hindra at UiO bryt ut av universitetssamarbeidet.

PROTESTERER: Franskprofessor Hans Petter Helland og fleirtalet av kollegaene hans på franskseksjonen protesterer mot tilrådinga om at UiO bør trekkja seg ut av studiesenteret i Caen.

Foto: Ola Sæther

Førstkomande fredag skal fakultetsstyret på Det humanistiske fakultetet avgjera  UiO si vidare tilknyting til Fransk-norsk senter for utveksling og samarbeid  i Caen (OFNEC). Då kjem forslaget om at UiO bør trekkja seg ut opp som ei orienteringssak. Om fakultetsstyret ikkje går imot tilrådinga, vil UiO gi melding om at det trekkjer seg ut på det nasjonale fakultetsmøtet 4. og 5. mai, går det fram av sakspapira. Då kan UiO vera heilt ute av samarbeidet innan 31. desember 2016.

Det høyrer med til historia at UiO og universiteta i Agder, Bergen, Tromsø og NTNU i Trondheim fornya samarbeidsavtalen i desember i fjor. Då var allereie rapporten som konkluderte med at UiO burde trekkja seg ut klar, men ikkje offentleggjort. Rapporten er laga av eit utval som blei sett ned av universitetsleiinga for å gå gjennom alle utanlandssentra UiO deltar i.

Eit argument for å avvikla samarbeidet om studiesenteret i Caen, er at det er store vikarutgifter for den institusjonen som studieleiaren kjem ifrå. Eit anna argument er at det er for få studentar som ynskjer å studera der. Det tredje argumentet er at administrasjonen er for stor og byråkratisk og er for ressurskrevjande både økonomisk og når det gjeld personell, står det i konklusjonen til dekan Trine Syvertsen, som byggjer på tilrådingane i evalueringsrapporten. Det blir også lagt vekt på at løyvinga på 6o0 000 kroner frå Senter for internasjonalisering av utdanning (SiU) til årskurset på Det norske studiesenteret vil halda fram, sjølv om senteret blir lagt ned. Dekanen får støtte frå leiinga ved Institutt for litteratur, områdestudium og europeiske språk (ILOS). Det blir vist til at innspela frå franskseksjonen i stor grad er drøfta i innspelet frå instituttet, og deira argument er difor ikkje tatt med i saksdokumenta.

Tok ikkje med argumenta mot nedlegging

Eit stort fleirtal av dei vitskapleg tilsette på franskseksjonen føler derimot at deira argument for at UiO framleis skal ha Studiesenteret i Caen som eit tilbod for studentar og forskarar,  ikkje blir tatt omsyn til. Det gjer både professor i fransk språk Hans Petter Helland og pensjonert universitetslektor Svein Erling Lorås heilt klart. Sistnemnde har 20 års røynsle frå Caen. I eit felles brev med seksjonsleiar Antin  Fougner Rydning i spissen, krev dei at UiO held fram med samarbeidet om studiesenteret, slik UiO har gjort sidan det blei stifta for 30 år sidan.

– Me blei kalla inn til seksjonsmøte om forslaget om å trekkja UiO ut av senteret. Då argumenterte me kraftig imot dette og viste til at det ville føra til nedlegging, og øydeleggja eit godt tilbod for alle franskstudentar i Noreg. Dessutan kunne me opplysa instituttleiaren om at om studiesenteret ville bli nedlagt, ville det heller ikkje bli mogleg å halda fram med årskurset i fransk fordi det heng nøye saman med drifta av senteret. Kunnskapsdepartementet ville då heller ikkje koma med sitt faste bidrag på over 600 000 kroner, fortel Hans Petter Helland og Svein Erling Lorås. Ingen av desse argumenta mot nedlegging kom med i innstillinga frå instituttet. Det einaste som blei nemnt var at årsstudiet i fransk kunne halda fram, og at Kunnskapsdepartementet ville halda fram med å betala 600 000 kroner som før.

Etter deira meining har instituttleiinga og fakultetsleiinga underslått mange fakta i sine argument for at UiO bør trekkja seg ut av samarbeidet om Studiesenteret i Caen.  Dei to har både seksjonsleiar Antin Fougner Rydning, franskprofessorane Marianne Hobæk Haff og Chantal Lyche som støttespelarar i kritikken av å trekkja UiO ut av samarbeidet. Også universitetslektor Martine Sørensen og mange andre i franskmiljøet i Noreg stiller seg bak protesten.

UiO får pengar for studiepoenga

– I  2013–2014 var det 19 studentar  av totalt 20 plassar på årskurset i fransk i Caen. Alle studentane er registrerte som UiO-studentar, og det er difor UiO som får studiepoenga for dei eksamenane som desse studentane tar. Om alle fullfører, vil det gi UiO ei inntekt på oppimot  400 000 kroner i året. Samtidig betaler UiO 270 000 kroner i kompensasjon for vikarutgifter til den institusjonen som studieleiaren på senteret kjem ifrå. I rapporten blir dette brukt som eitt av argumenta for å leggja ned senteret. Sanninga er at tidlegare betalte UiO 66 000 kroner i kompensasjon for vikarutgifter. Dette var ikkje nok til å dekkja lønna til ein vikar. Difor blei alle institusjonane einige om å heva denne summen, og UiOs del blei dermed på 270 000 kroner. Me synest det er svær rart at ein auke som fakultetet sjølv gjekk inn for i desember 2013, no blir brukt som argument for at UiO skal trekkja seg frå heile samarbeidet, seier Helland og Lorås.

Berebjelkane vil falla saman

I innspelet frå franskseksjonen til leiinga ved Institutt for litteratur, områdestudium og europeiske språk (ILOS) blir det vist til at om UiO trekkjer seg ut, vil alle berebjelkane studiesenteret er bygd på, falla saman. Då vil det bli svært vanskeleg å halda årskurset i gang.  Og det er nettopp på grunn av årskurset, at Senter for internasjonalisering av utdanning (SiU) på vegner av den norske staten årleg overfører 600 000 kroner til senteret, går det fram av skrivet frå franskseksjonen.

– Ekstra styrke for lærarutdanninga

Det blir også spådd at det vil få store konsekvensar for franskfaget si stilling både ved UiO og ved dei andre universiteta i Noreg.

– Årskurset vil med nokre enkle grep bli ein ekstra styrke for utdanninga av fransklærarar ved UiO med tanke på at institusjonen seier at det skal satsast på lærarutdanninga og framandspråka for å dekkja dokumenterte behov i samfunnet, seier Helland og Lorås.

Franskseksjonen skriv i sin kommentar at dei finn det underleg at rapporten ikkje har tatt med dette. Det blir også trekt fram at UiO satsar på å senda franskstudentar på bachelornivå til eit semester med fordjuping i Caen.

– Me har 15 plassar, men sist semester var det berre fem av studentane som brukte tilbodet fordi det var heilt nytt og ikkje kunne marknadsførast før det var vedtatt i alle styringsorgan i Caen. Me ser likevel at me kan arbeida  meir for å gjera tilbodet attraktivt for studentar både i Oslo og ved dei andre lærestadene i Noreg, seier dei to.

Ny avtale med HiOA

Fransksprofessor Chantal Lyche er årskursleiar ved Studiesenteret i Caen. Ho vedgår at ting kan bli betre.

– Jau, absolutt. Det må satsast endå meir målretta for at det skal bli fleire aktivitetar på senteret. Det blir også gjort. For kort tid sidan skreiv Høgskulen i Oslo og Akershus og UiO under ein avtale for å utvikla årskurset vidare frå hausten 2015, opplyser Chantal Lyche til Uniforum.

Franskseksjonen viser i sitt innspel til at studiesenteret har medverka til at det har vorte etablert forskarnettverk mellom Noreg og Frankrike. Dei viser mellom anna til konkrete resultat på forskingsfronten av samarbeidet med Universitetet i Caen. Resultatet er blitt konferansar, felles publikasjonar og redaktørarbeid for eit vitskapleg tidsskrift.

Franskmiljøet skriv i sin kommentar at dei er overtydde om at det vil vera til stor skade for  samarbeidet mellom Noreg og Frankrike om UiO trekkjer seg ut av studiesenteret.

 – Ja, det er me visse på. Dette gir også heilt feil signal både politisk og fagleg der både UiO og dei andre lærestadene ynskjer å satsa på å byggja opp under undervisning i fransk  i Noreg, og ikkje vengestekka faget, peikar dei på.

 

Emneord: Internasjonalisering, Universitetspolitikk Av Martin Toft
Publisert 2. apr. 2014 14:50 - Sist endra 3. apr. 2014 01:01
Legg til kommentar

Logg inn for å kommentere

Ikkje UiO- eller Feide-brukar?
Opprett ein WebID-brukar for å kommentere