Sonja Biserko er tildelt prisen for arbeidet med flyktningar, kvinnerettar og dokumentasjon av krigsbrotsverk. På det viset har innsatsen hennar vore avgjerande for forsvaret av menneskerettar både i Serbia og internasjonalt, går det fram av grunngjevinga for å gi henne prisen, som offisielt heiter UiOs menneskerettspris-Lisl og Leo Eitingers fond.
Biserko blir også skildra som ein forsvarar av ideen om ein moderne stat som vernar individuelle rettar – samtidig som ho sjølv har opplevd fysiske og psykiske overgrep og daglege valds- og drapstrugsmål. Prisvinnaren er også leiar for den serbiske Helsingforskomiteen.
I ein samtale med assisterande kommunikasjonsdirektør Marina Tofting, uttrykte ho ein viss optimisme over dagens situasjon i Serbia.
– Dei siste to åra har eg følt meg trygg, og eg ser at dagens regjering er meir opptatt av å forsvara menneskerettane i Serbia. Men serbisk media er derimot framleis opptatt av status quo, meinte Biserko.
I eit intervju med Uniforum etterlyser ho også ein ny intellektuell elite som kan vera gode førebilete for den serbiske ungdommen.
– I dag lever for mange av dei i fortida og ser på Serbia som eit offer og ikkje som det landet som har stått bak svært mange av overgrepa mot sivile i det tidlegare Jugoslavia. Håpet mitt er at menneskerettsutdanning av den yngre generasjonen skal endra den nasjonalistiske haldninga og draumen om serbisk stordom, seier ho i intervjuet med Uniforum. Heile intervjuet blir også publisert i Uniforums papirutgåve 18. november.
Logg inn for å kommentere
Ikkje UiO- eller Feide-brukar?
Opprett ein WebID-brukar for å kommentere