Fekk Kongens sølv

Grete Klempel Startheim er tildelt Kongens fortenestmedalje i sølv. Ho fekk festa medaljen på brystet av universitetsdirektør Gunn-Elin Aa. Bjørneboe på Lunsj med kultur fredag 2. oktober.  

KONGENS SØLV: Spesialrådgivar Grete Klempel Starheim får festa Kongens fortenestmedalje i sølv på bryster av universitetsdirektør Gunn-Elin Aa. Bjørneboe.

Foto: Francesco Saggio

Grete Klempel Starheim får denne heideren for den store innsatsen ho har gjort for å foreina kunst, kultur og arkitektur på fleire område på Universitetet i Oslo.

Ein viktig grunn til at ho får denne heideren, er at ho tok initiativet til fredagsarrangementet Lunsj med kultur. Sidan det starta opp hausten 2000, har ho hatt ansvaret for 269 lunsjar med kultur.

- Uvurderleg person for UiO

– Alle som kjenner Grete, gler seg med henne og den heideren ho blir til del. Ho har vore ein svært entusiastisk medarbeidar og er ein uvurderleg person for Universitetet i Oslo, sa universitetsdirektør Gunn-Elin Aa. Bjørneboe. Ho viste til at Grete Starheim hadde vore tilsett ved Universitetet i Oslo sidan 1971. Før det var ho student i nordisk. Fram til år 2000 var ho fakultetsdirektør ved Det historisk-filosofiske fakultetet.

– Det var typisk for Grete at då ho slutta i den stillinga for å bli spesialrådgjevar i Informasjonsavdelinga, så var det kultur ho ville arbeida med, sa Bjørneboe, før ho delte ut medaljen til Grete Starheim.

- Ser fram til å møta Kongen

– Denne anerkjenninga av Lunsj med kultur er samtidig også ei anerkjenning av alliansen mellom kultur og forsking. Eg er glad for den sjansen UiO gav meg til å avslutta yrkeslivet mitt med å jobba med kultur. Som rojalist ser eg også fram til å møta Kongen og takka han for medaljen, vedgjekk ho.

Så introduserte ho operatalenta Elina Volkane og Sebastian Wemmerløw,.som skulle framføra ulike songar frå kjende operaer.
 


 

Emneord: Priser, Kultur Av Martin Toft
Publisert 5. okt. 2009 09:10 - Sist endra 5. okt. 2009 10:05
Legg til kommentar

Logg inn for å kommentere

Ikkje UiO- eller Feide-brukar?
Opprett ein WebID-brukar for å kommentere