UiO er i Europas meisterliga for å vera mellom dei mest synlege på nett

To gonger i året publiserer Webometrics, som er tett knytt til det spanske forskingsrådet, rangeringa over dei universiteta i verda som er aller mest synlege på nett gjennom tilgang til vitskaplege artiklar, nettsider og anna viktig materiell. 2021 er det attande året rangeringa blir publisert sidan den starta i 2004.

Københavns Universitet best i Norden

Universitetet i Oslo gjer det som regel bra på denne målinga. Det gjer det også denne gongen. I Norden kan UiO berre sjå seg slått av Københavns Universitet og Helsingfors universitet.  Dermed tangerer UiO resultatet frå augustrangeringa. Københavns Universitet gjer det altså best i Norden, og når heilt opp til femteplass i Europa, medan Helsingfors universitet og Universitetet i Oslo endar på høvesvis ein niande- og ein tolvteplass i Europa.  Det svenske universitetet som gjer det best, er Uppsala universitet på ein 17. plass. 

Kommunikasjonsdirektør Berit Kolberg Rossiné  er godt nøgd med resultatet til UiO på denne rangeringa. – Me er glad for at uio.no blir oppfatta som ein truverdig nettstad. Plasseringa speglar at me har ein stor nettstad som mange lenkjer til, skriv ho i ei tekstmelding til Uniforum. Og ho legg til: – Me jobbar kontinuerleg med å betra nettstaden, og å sørgja for at uio.no har godt og relevant innhald, lovar Berit Kolberg Rossiné. 

Dei nest beste norske universiteta er NTNU som hamnar som nummer 50 og Universitetet i Bergen som plasserer seg som nummer 56 i Europa. 

ETH på topp i Europa

I Europa er det ETH Zürich som inntar tetplassen, fylgt av University of Edinburgh og Utrecht University i Nederland. Blant dei ti beste i Europa er det to britiske og to nederlandske universitet. Både University of Oxford og University of Cambridge kjem bak UiO på denne rangeringa.

Amerikansk universitet tar tetplassen i verda

På verdsrangeringa plasserer UiO seg som nummer 48, medan den blir toppa av University of Washington frå Seattle i USA. Dei to andre pallplasseringane tar Cornell University og Johns Hopkins University. Det beste europeiske universitetet ETH Zürich kjem på tiandeplass over dei mest synlege universiteta i verda på nett. Det får likevel ei betre plassering enn Harvard University som er eit av verdas mest prestisjetunge universitet. Harvard hamnar på trettandeplassen. University of Tokyo får den beste plasseringa av dei asiatiske universiteta og landar som nummer 28.

Metodologien bak målinga

Webometrics er ein del av det spanske forskingsrådet, og det måler i hovudsak kor synleg og tilgjengeleg eit universitet er på nett. Då handlar det både om nettsider, forskingsartiklar og anna materiell som universiteta gir ut.

Kor synleg ein institusjon er på nett utgjer 50 prosent av det endelege resultatet. Det som tel nest mest er kor mange vitskaplege artiklar institusjonen har mellom dei 10 prosent mest siterte forskingsartiklane i 26 ulike fag i perioden 2015–2019. Det utgjer 35 prosent av den samla poengsummen. Talet på siteringar frå dei beste forskarane tilgjengelege på nett, utgjer 10 prosent, medan det samla talet på nettsider med felles nettadresse bidrar med 5 prosent av den samla karakteren institusjonen får på målinga til Webometrics.

(Oppdatert klokka 20:34 med kommentar frå kommunikasjonsdirektør Berit Kolberg Rossine på UiO)