UiO er mellom dei fire mest internasjonale universiteta i Norden

Mellom alle verdas mest internasjonale universitet kjem Universitetet i Oslo på 41. plass. I fjor kom universitetet på 43.plass på denne lista. Då Uniforum presenterer resultatet for UiO-rektor Svein Stølen vert han svært glad.

– Så hyggeleg! UiO er heilt klart eit nasjonalt universitet, men også eit tydeleg internasjonalt orientert universitet. Det er viktig at me både er viktige for Noreg og Oslo, og at me bidrar godt til den globale kunnskapsallmenningen, er reaksjonen til Svein Stølen.

Det er Times Higher Education som står bak denne rangeringa, og det er også dei som kvart år publiserer ei rangering over verdas beste universitet. Sist gong den rangeringa blei publisert, hamna UiO som nummer 127.

Fire land i Asia og Europa dominerer

Lista over verdas ti mest internasjonale universitet er i stor grad dominert av to land i Asia og to land i Europa. Landa er Hongkong og Singapore i Asia og Sveits og Storbritannia i Europa. Øvst på lista tronar University of Hong Kong og ETH University i Zürich i Sveits. På tredjeplass kjem endå eit Hongkong-universitet, Chinese University of Hong Kong. På fjerdeplass kjem Oxford University, tett fylgt av Imperial College London.

USA langt nede

Først heile nede på 37.plass kjem det mest internasjonale universitetet i USA. Det er California Institute of Technology. Vanlegvis er det mange universitet frå USA på dei ti øvste plassane på universitetsrangeringane. Det einaste universitet frå Nord-Amerika som får ei rimeleg, god plassering på denne lista, er University of Toronto i Canada på 17. plass.

Fire hovudindikatorar

Ifylgje Times Higher Education er vurderingane av dei mest internasjonale universiteta i verda gjort på grunnlag av kor mange internasjonale studentar dei har, kor mange internasjonale tilsette dei har og kor mange medforfattarskap dei har i forsking. I tillegg byggjer rangeringa på korleis universiteta ligg på den internasjonale rangeringa av omdømme, som også Times Higher Education står bak.

UiOs fellesskap er internasjonalt

Rektor Svein Stølen er ikkje i tvil om kvifor Universitetet i Oslo plasserer seg så godt på denne rangeringa.

– Indikatorane dei brukar tydeliggjer det. UiOs fellesskap er internasjonalt, og andelen internasjonale medforfattarskap er betydeleg. Det gjer oss rikare som universitet og som «samfunn», er han viss på.

– Er det noko meir som kan gjerast for at UiO blir endå meir internasjonal? 

– Eg meiner me skal vera nøgde med det me er - det er alltid snakk om balansar. Det er ikkje noko mål å toppa ei slik rangering, men det er fint å vera eit reelt «internasjonalt» universitet, svarar Svein Stølen Uniforum i ein epost.

Lita internasjonalisering i Kina

Sjølv om universitet frå Asia gjer det bra på rangeringa over verdas mest internasjonale universitet, kjem det mest internasjonale kinesiske universitetet først som nummer 122. Vanlegvis plasserer dei kinesiske universiteta seg høgt oppe på rangeringa når rangeringane over verdas beste universitet blir publiserte.

På denne lista ligg universitet både i Spania, Israel og Mexico langt høgare enn det mest internasjonale kinesiske universitetet. Det er Tongji University i Shanghai. Kinas og ein av verdas mest kjende arkitektar, Wang Shu, er ein av dei som har studert på det universitetet, viser eit søk i Wikipedia og på Google.  

Dette er lista over verdas  50 mest internasjonale universitet: