Også i januar 2004 publiserte Shanghai Jiao Tong University ei liknande vurdering av 2000 universitet. Den gongen kom UiO på tredjeplass i Norden, på 19. plass i Europa og på rundt 65. plass på verdsstatistikken.
I den siste rangeringa har Københavns universitet gått forbi både UiO og Uppsala universitet og har inntatt andreplassen, medan Karolinska institutet framleis ligg på førsteplass.
Harvard best
Verdas beste universitet er framleis Harvard-universitetet i USA, tett fylgd av University of Cambridge, som då også naturlegvis tar førsteplassen på lista over dei beste europeiske universiteta. På andreplass fylgjer Oxford University, deretter Imperial College London og University College London før det første ikkje-britiske universitetet kjem på femteplass. Det er det sveitsiske universitetet Swiss Federal Insitute of Technology i Zürich. På sjette- og sjuandeplass fylgjer Universitetet i Utrecht i Nederland og Karolinska Institutet i Stockholm.
NTNU i Trondheim er denne gongen plassert mellom dei 80 og 123 beste universiteta i Europa medan det er plassert mellom dei 203 og 300 beste universiteta på verdsrankinga.
- UiO er i meisterligakvalifiseringa
- Men eg er glad for at UiO trass alt er med i kvalifiseringa til den europeiske meisterligaen, og avstanden er liten til dei som ligg føre oss, seier rektor Arild Underdal til Uniforum. Han synest likevel det er verdt å understreka at undersøkinga favoriserer naturvitskap, teknologi og medisin.
- Difor får ikkje den glimrande rangeringa av Det humanistiske fakultetet i The Times noko å seia i denne undersøkinga. Heller ikkje eit av verdas beste samfunnsvitskaplege universitetet, London School of Economics, kjem med på lista over dei 100 beste universiteta i Europa. Sidan det er slike kriterium som ligg til grunn, synest eg at Noregs teknisk naturvitskaplege universitet (NTNU) i Trondheim burde gjort det endå betre på denne rangeringa, seier UiO-rektoren.
Logg inn for å kommentere
Ikkje UiO- eller Feide-brukar?
Opprett ein WebID-brukar for å kommentere