Det byggjer seg opp eit drama mellom UiO og Kultur- og likestillingsdepartementet på Tullinløkka

Eit nytt teaterbygg på Tullinløkka inneber ein arealkonflikt med tidlegare utgreiingar om bruk av området, for det er ikkje plass til både eit nytt teaterbygg og ei utviding av Historisk museum. Det slår UiO fast i eit notat til Kultur- og likestillingsdepartementet.

BRYGGJER OPP TIL STRID: No bryggjer det opp til ny strid om den framtidige bruken av Tullinløkka. Kultur- og likestillingsdepartementet har bede Statsbygg greia ut om det kan plasserast eit teaterbygg for Nationaltheatret under bakken. UiO meiner dette strir med planar om ei framtidig utviding av Historisk museum.(Arkivfoto:Ola Gamst Sæther)

Det er eit innspel frå Statsbygg som har fått universitetsdirektør Arne Benjaminsen og eigedomsdirektør John Skogen til å senda inn eit notat med eit svært dramatisk innhald til Kultur- og likestillingsdepartementet.

For Statsbygg har på vegner av nettopp det departementet gjennomført ein moglegheitsstudie for nytt teaterbygg på Tullinløkka og vil etter planen senda inn planinitiativ til Plan- og bygningsetaten i Oslo kommune i første kvartal av 2024. I det aktuelle forslaget vil også Nasjonalgalleriet inngå som ein del av areala til det nye teaterbygget, går det fram av notatet som Uniforum har fått ein kopi av. Det er datert 25. januar i år.

I strid med tidlegare utgreiingar

På vegner av UiO meiner dei to direktørane dette er i strid med tidlegare utgreiingar for dette omstridde området midt i Oslogryta. Dei viser til at både framtidig bruk av Nasjonalgalleriet og nybygg på Tullinløkka tidlegare har vore greidd ut for å løysa behovet Kulturhistorisk museum har for areal i sentrum. Det har den dåverande regjeringa kome med ei stadfesting av i 2013 i samband med 3-lokasjonsmodellen, ein modell der Kulturhistorisk museum skulle ha tre lokale, eitt på Bygdøy (Vikingtidsmuseet), eitt i sentrum (Historisk museum), og eitt på Økern (magasinbygg). I brevet skriv dei: "VI ønsker å understreke at disse utredningene fremdeles representerer UiOs interesser i området og viser til Masterplan for UiOs eiendommer (kap. 6.2 og 8.1-4)"

I 2012 vedtok også Universitetsstyret at dei ynskte eit nybygg for Kulturhistorisk museum på Tullinløkka.

• Les meir: Ønsker nybygg for Kulturhistorisk museum på Tullinløkka

Ikkje plass til både teaterbygg og utvida museum

Den masterplanen som dei omtalar, skildrar korleis ei rehabilitering av Historisk museum med nye areal under bakken og overtaking av Nasjonalgalleriet vil kunna løysa Kulturhistorisk museum sine plassproblem i sentrum, og kunna inngå ei heilskapleg utvikling av Tullinløkka og Campus sentrum. Eit nytt teaterbygg på Tullinløkka vil derfor bli dramatisk for det er ikkje plass til både eit nytt teaterbygg og ei utviding av Historisk museum.

"UiO ønsker derfor å gjøre oppmerksom på at nytt teaterbygg på Tullinløkka innebærer en arealkonflikt med hensyn til tidligere utredninger om bruk av Tullinløkka ettersom det ikke er plass til både nytt teaterbygg og utvidelse av Historisk museum slik gjeldende reguleringsplan tilrettelegger for", skriv universitetsdirektør Arne Benjaminsen og eigedomsdirektør John Skogen.

Dei understrekar at UiO ikkje ynskjer at denne arealkonflikten skal vera tema i ein eventuell reguleringsplan og ber derfor om at notatet dei har skrive fylgjer saka til politisk handsaming slik at arealkonflikten kan avklarast før Statsbygg sender inn planinitiativet til Plan og bygningsetaten i Oslo kommune.

OMSTRIDDE TULLINLØKKA: Statsbygg skal greia ut om det kan byggjast teaterbygg for Nationaltheatret under Tullinløkka i tilknyting til Nasjonalgalleriet til venstre på biletet. UiO-leiinga skriv i eit notat til Kultur- og likestillingsdepartement at det vil ramma ei framtidig utviding av Historisk museum til høgre på biletet. (Arkivfoto: Ola Gamst Sæther)

Utfordrande grunnforhold

I notatet kjem dei også inn på dei vanskelege grunnforholda i Tullinløkka-området som Uniforum tidlegare har skrive om.

• Les meir:

Historisk museum har sokke med ein halv meter- kan kosta 1,5 milliardar å fiksa bygningen

Dei peikar på at grunnforholda er utfordrande og at Mulitconsult på vegner av UiO har utarbeid ein rapport om dei pågåande setningsskadene ved Historisk museum i Frederiks gate 2. I konklusjonen står det at bygningen må refundamenterast innan fem til ti år, om det ikkje skal oppstå uoppretteleg skade på bygget.

Uansett kven som skal byggja ut på Tullinløkka, så må dette verta koordinert med refundamenteringsarbeidet for Historisk museum, understrekar dei to toppdirektørane i notatet dei har sendt til Kultur- og likestillingsdepartementet.

Statsbygg har tinga oppstartsmøte med Oslo kommune

Uniforum har også vore i kontakt med Kultur- og likestillingsdepartementet i denne saka.

Kommunikasjonseininga opplyser at Statsbygg i januar 2024 har tinga oppstartsmøte for reguleringsplanarbeidet hjå Oslo kommune, for å undersøkja handlingsrommet for å skipa ein ny moderne scene for Nationaltheatret på Tullinløkka og i Nasjonalgalleriet.

I ein e-post Uniforum har fått frå departementet, blir det vist til at dette er ein del av det utgreiingsarbeidet Statsbygg gjer i prosjektet om Nationaltheatret, og i tråd med oppdrag frå Kultur- og likestillingsdepartementet.

Statsbygg og universitetet har god dialog

Etter deira meining har Universitetet i Oslo og Statsbygg vore i nær kontakt med kvarandre om planane for området.

"Universitetet i Oslo er ein viktig nabo for prosjektet, og Statsbygg og universitetet har god dialog. Leiinga ved Universitetet har vorte orientert om prosjektet", opplyser Kultur- og likestilingsdepartementet i eposten til Uniforum. Det går fram at det er ein viktig rapport dei ventar på frå Statsbygg.

"Kultur- og likestillingsdepartementet skal etter planen motta utgreiinga frå Statsbygg i fyrste kvartal 2024. Utgreiinga er ein del av grunnlaget for ei avgjerd om prosjektet i regjeringa" skriv kommunikasjonseininga til Uniforum.