Stortingsrepresentant Kristin Vinje er Høgres fraksjonsleiar i Kyrkje-, utdannings- og forskingskomiteen i Stortinget. Ho er svært glad for at regjeringspartia og KrF og Venstre er blitt einige om å styrkja den resultatbaserte omfordelinga av forskingsmidlar (RBO) med 50 millionar kroner i 2014. Dette er pengar som kjem på toppen av dei 100 millionar kronene som den resultatbaserte omfordelinga blei styrkt med i tilleggsproposisjonen for 2014-budsjettet.
– Eit allereie sterkt budsjett for forsking og høgare utdanning er blitt endå betre, synest Kristin Vinje. For UiO vil dette seia at det blir 17 millionar kroner ekstra til resultatbasert omfordeling av forskingsmidlar. Høgskolen i Oslo og Akershus får 430 000 kroner, medan Arkitekt- og designhøgskulen får 22 000 kroner. Halvparten av dei samla midlane blir kopla til EU-indikatoren i resultatbasert omfordeling, medan den andre halvparten blir knytt til publiseringsindikatoren.
UiO-rektor Ole Petter Ottersen er svært glad for at det blir meir pengar i potten til resultabasert omfordeling av forskingsmidlar.
- Dette er jo stort! Me har jo lenge ynskt oss ei utviding av RBO-potten. Det var fint å få 100 millionar i aukei statsbudsjettet i oktober i fjor. Og fint å få endå 50 millionar kroner no. Dette er bra, fordi UiO har fått ein reduksjon i insentivmidlar den siste tida trass i ein auke i publisering og ein auke i utteljinga frå EU, seier Ole Petter Ottersen. Han har også forslag til kva meir regjeringa bør gjera.
- Me håpar no at det neste steget regjeringspartia tar, er å revidera heile den insentivbaserte finansieringsordninga slik at den verkeleg støttar opp under kvalitet i forsking og utdanning.
Satsar på forskingspengar frå EU
Kristin Vinje fortel at fordelinga av pengane er resultatet av ein bestemt strategi.
– Styrkinga blir særleg retta mot dei institusjonane som har lykkast i konkurransen om forskingspengar frå EU. Derfor er 25 millionar kroner av auken øyremerkt EU-indikatoren i RBO, seier ho. På den måten meiner ho at regjeringa sender eit tydeleg signal om kor viktig det er at norske forskarar deltar på dei internasjonale konkurransearenaene og skaffar seg ein slik posisjon at Noreg skal lykkast i EUs nye program Horisont 2020.
– Regjeringa reknar med ei styrka norsk deltaking og bidrar ved å satsa endå meir på dei som allereie har vist at dei kan, peikar Kristin Vinje på.
Styrkjer instituttsektoren
I revidert budsjett får også forskingsinstitutta styrkt basisløyvinga si med 15 millionar kroner. I Bergen ventar Uni Research å få skaffa seg ein del av desse pengane. – Vi byrja for alvor å jobbe med å få basisløyving i fjor haust. Då er det heilt fantastisk at det kan sjå ut som om vi får pengar allereie i 2014. Ei slik løyving vil kunne gjera det mogleg å setja i gang prosjekt me elles ikkje hadde hatt finansiering til, og det gir oss fridom til å satsa nytt, seier administrerande direktør Aina Berg i Uni Research til På Høyden.
Revidert nasjonalbudsjett blei presentert av regjeringa 14. mai, og inneheld endringar i statsbudsjettet for 2014. KrF og V har hatt tingingar med regjeringspartia Høgre og Framstegspartiet, og dei har no avtalt å flytta på 380 millionar kroner. Pengane er henta frå postane «Ymse» (323,8 mill.) og «Redusert kvotekjøp» (56,3 mill.) melder På Høyden i dag.
(Oppdatert kl 23.05)
Logg inn for å kommentere