Den norske Studentersangforening blei heidra etter å ha blitt noregsmeister i korsong

Noregs eldste kor, Den norske Studentersangforening vann nyleg  NM for beste elitekor og beste sakralkor og tok også sigeren i noregsmeisterfinalen. Denne veka markerte UiO og rektor Svein Stølen meisterskapen til UiO-koret med kaker og god drikke.

Et mannskor står og synger i 10. etasje i Lucy Smiths hus

FEST FOR NOREGS BESTE KOR:  UiO markerte noregsmeisterskapen til Den norske Studentersangerforening med kaker og god drikke.

Foto: Martin Toft

Det var i midten av oktober Den norske Studentersangforening vann både eliteklassen og sakralklassen under NM for kor i Trondheim. Det var ei fin innleiing på 175-årsjublileet som koret skal feira i 2020. Det gjer dette UiO-koret til Noregs eldste kor. 

Imponerte rektor

Heile koret blei  invitert til heider frå rektor Svein Stølen i 10. etasje i Lucy Smiths hus tidlegare denne veka.

– Eg er imponert over prestasjonen dykkar. Det vert sagt at om det er best på ski i Noreg, er du også best på ski i verda. Det er det same med norske kor. Er dei best i Noreg, er dei også best i verda, var dei rosande orda han kom med.

Stølen kom også inn på dei faste programpostane koret har for Universitetet i Oslo.

– Det var heilt fantastisk for dei som var til stades på utdelingane av Anders Jahres medisinske prisar å høyra både Den norske Studentersangforening og Kvinnelige Studenters Sangforening, konstaterte han. 

Markerer 175-årsjubileum i Oslo rådhus i 2020

Styreformann for koret, Sirius Bakke kvitterte med å invitera rektor Svein Stølen til 175-årsjubileet i Oslo rådhus i 2020.

– Me føler tilknyting til Universitetet i Oslo. Ein gong i veka øver me i Stort møterom i Georg Sverdrups hus og ein gong i semesteret har me konsert i Universitetets aula,  i tillegg til at me deltar på opninga og på doktorkreeringane, fortalde han til Uniforum. 

Mannskoret har ein kvinneleg dirigent. Sidan 2016 har Marit Tøndel Bodsberg dirigert koret.

DELTE UT BLOMAR: Rektor Svein Stølen gir blomar til dirigent Marit Tøndel Bodsberg som leidde Den norske Studentersangforening til noregsmeisterskap i korsong. (Foto: Martin Toft)

Og med ei rose i den eine handa og eit glas i den andre, gjekk koret og dirigenten  fram for å syngja eitt av glansnummera sine. Før det hadde kvar og ein av kormedlemane fått ei rose kvar frå rektor Svein Stølen.

 

Emneord: Kultur, Musikk Av Martin Toft
Publisert 17. nov. 2019 23:16 - Sist endra 18. nov. 2019 00:18
Legg til kommentar

Logg inn for å kommentere

Ikkje UiO- eller Feide-brukar?
Opprett ein WebID-brukar for å kommentere