Ingen gjenstandar skadde då vatnet fløymde inn i Historisk museum

Vatnet strøymde inn i kjellaren i Historisk museum i Frederiks gate 2 i natt, men alle gjenstandane er uskadde. Det opplyser arkeolog og magasinforvaltar Hanne Lovise Aannestad ved Kulturhistorisk museum til Uniforum.

Ei kvinne tørkar opp vatnet i museumskjellaren med ein kost.

TØRKAR OPP: Magasinforvaltar Hanne- Lovise Aannestad måtte tørka opp i kjellaren i Historisk museum etter at vatnet strøymde inn under uveret  i Oslo natt til sundag. (Foto: Silje Opdahl Mathisen, Kulturhistorisk museum)

Foto: Silje Opdahl Mathisen, Kulturhistorisk museum

I Oslo styrta regnet ned samtidig som det kom lyn og torever.  Mange av gatene i Oslo blei forvandla til små elvar. Det førte til at vatnet strøymde inn i kjellaren i Historisk museum i Frederiks gate. Til saman fire tilsette ved Kulturhistorisk museum stilte opp for å rydda opp etter at vatnet hadde tatt vegen inn i  museumsbygningen. Ei av to i Arkeologisk seksjon som måtte rykka ut, var magasinforvaltar Hanne Lovise Aanestad.

– Eg er akkurat oppe frå kjellaren no. Ingen gjenstandar  er skadde, men det er litt vatn på golvet i magasinet, fortel ho til Uniforum.  Kulturhistorisk museum er godt førebudd på at sånt kan skje.

– Vatn og brann er det verste for gjenstandane. Derfor har me rutinar om at me har gjenstandane på paller. Vaktsentralen jobba også i heile natt for å pumpa ut vatn frå tekniske rom på museet. Pumpene hadde slutta å fungera, ifylgje Vaktsentralen, seier Aannestad.  For henne var det aller viktigaste å observera at det var ingen vasskader.

–Gjenstandane hadde klart seg fint. Me var fire tilsette frå Seksjon for samlingar,  forvalting og konservering som tok turen til museet for å sjå korleis det stod til med gjenstandane i magasina i kjellaren. Me måtte bretta opp skjorteermene  for å få tørka opp vatnet. Trass alt gjekk det fint, slår ho fast.

Av Martin Toft
Publisert 4. aug. 2019 18:01 - Sist endra 21. aug. 2019 14:53
Legg til kommentar

Logg inn for å kommentere

Ikkje UiO- eller Feide-brukar?
Opprett ein WebID-brukar for å kommentere