Det var folk i alle aldrar som hadde tatt plass i Gamle festsal tysdag 23. august for å delta på markeringa av 70-årsjubileet for Den internasjonale sommarskulen. Fleire av dei var representantar for dei 30 000 studentane frå 150 land som har gått der sidan skulen starta opp i 1947. Den eldste sommarskulestudenten kom frå 1949-kullet, medan den yngste kom frå 2014-kullet. Sommarskuledirektør Enar Vannebo presenterte både veteranane William Anderson (1949) og John Slade frå USA (1981, 1986,2009 og 2015). Dei to andre tilhøyrde den yngre generasjonen, Jeanette da Silva frå Noreg (1997) og Alina Tomescu-Baciu frå Romania (2013 og 2014).
Unikor opna markeringa før sommarskuledirektør Einar Vannebo gav eit historisk tilbakeblikk på historia til Den internasjononale sommarskulen, som altså starta som ein skule for amerikanske studentar, men som etter kvart blei ein skule for studentar frå heile verda. - I dag har sommarskulen også ansvaret for betalkurset i norsk for akademikarar. Difor er det aktivitetar heile året på sommarskulen, understreka han.
I helsingstalen sin viste UiO-rektor Ole Petter Ottersen korleis han blei kalla inn til eit møte med den tidlegare visepresidenten i USA, Walter Mondale, før han hadde tatt over rektorkjeda. - Eg tenkte at det måtte vera noko frykteleg viktig sidan han ynskte ein eigen samtale med meg. Det viste seg at det han hadde på hjarta var ei bøn om at det måtte etablerast eit kurs i menneskerettar på Den internasjonale sommarskulen. Det var ein viktig del av den norske tradisjonen, meinte han. Så eg måtte svinga meg rundt, og etter kvart klarte med å få det på plass, fortalde han.
Fleire av kursleiarane var også til stades. Ein av dei var tidlegare NUPI-forskar Arne Olav Brundtland som i 33 år heldt sommarkurs i internasjonal politikk. - Gro Harlem Brundtland har fortald at det var ei stor utfordring for planlegginga av somrane til familien, sa Ole Petter Ottersen. I tillegg kunne tidlegare husmor og kursleiar Sonia Mykletun fortelja om kor godt ho blei tatt imot første gong ho kom til Den internasjonale sommarskulen. - Mange av dei blei seinare ein viktig del av omgangskrinsen min, sa ho.
Etter jubileumsmarkeringa i Gamle festsal var det ei mottaking i Professorboligen.
Logg inn for å kommentere