Kva gjer du på i vinterferien?

Stein Erik Ulvund, professor i pedagogikk ved Pedagogisk forskingsinstitutt

- Nei, eg har ikkje noko som heiter vinterferie. Dessutan ville eg heller ikkje hatt tid til å ha ferie no. Men kona mi er heime og aktiviserer barna våre som sjølvsagt har vinterferie.

Otto Øgrim, pensjonert universitetslektor i fysikk

- Eg er pensjonist og har ikkje vinterferie. Dessutan kan eg heller ikkje gå på ski sidan eg har problem med å halda balansen.

Oscar Castro, betjent ved Teknisk avdeling

- Eg jobbar medan både barna mine og kona mi er heime i vinterferien. Kona tok ferie denne veka for å kunna passa på barna våre.

Edvard Befring, professor i spesialpedagogikk, Det utdanningsvitskaplege fakultetet

- Eg held førelesingar og sit og skriv ferdig ein artikkel til eit fagtidsskrift. Og i tillegg må eg gjera ferdig ei vitskapleg vurdering for ein komité som skal avgjera kven som får ein ny forskarstilling. Difor blir det ikkje tid til nokon skiturar for meg.

Siri Lindøe, influensasjuk hovudfagsstudent i idéhistorie

- Eg har aldri brydd meg om å ta vinterferie på denne tida av året. Nei, vinterferien tar eg i mai for då kan eg anten dra på skitur på Finse eller eg kan reisa til Sør-Europa for å nyta sol og varme.