Mosegrodde intellektuelle er blitt veggpryd

Med mose som hår og for enkelte som skjeggpryd, har verdskjende intellektuelle og kunstnarar no blitt veggkunst på muren langs Gaustadbekken ved Forskningsparken i Oslo.

KJENDISVEGG: Albert Einstein, Nelson Mandela og Marie Curie er dei første i rekkja av berømte intellektuelle og kunstnarar som prydar muren langs Gaustadbekken ved Forskningsparken.

Foto: Ola Sæther

Nelson Mandela, Marie Curie, Albert Einstein og Isaac Newton er fire av dei verdskjende intellektuelle som no prydar murveggen langs Gaustadbekken ved Forskningsparken. Men også norske vitskapsmenn, som informatikkprofessoren Ole-Johan Dahl har fått sin fortente plass på Universitetet i Oslos svar på Hollywood Walk of Fame. Det er kunstnarkollektivet Påfuglen som står bak kunstprosjektet.

Ifylgje prosjektleiar Ask Rosseland er fylgjande kjende personar portretterte på murveggen: Albert Einstein, Nelson Mandela, Marie Curie, Nicolas Tesla, Leonardo da Vinci, Steve Jobs, Camilla Collett, Sitting Bull, Fridtjof Nansen, Frida Kahlo, Ole-Johan Dahl, Isaac Newton, Gregory Bateson og Stephen Hawking. Aftenposten melder i dag at Påfuglen – med kunstnarar frå det store atelierfellesskapet i Oslo sentrum – fekk i oppdrag å laga ei utsmykking som også kan bidra til å hindra tagging.