Ei oppsummering av tiltak som er sette i verk, eller er planlagde for Palestina og Ukraina blei lagt fram som ei informasjonssak for universitetsstyret i dag. Under den førre Palestina-debatten i UiO-styret den 2. desember lova rektor Ragnhild Hennum at det skulle bli lagt fram ei juridisk vurdering av det rettslege ansvaret medlemane i styret har for Israel-avtalar gjennom forskingsprogram som Horisont Europa. Som Uniforum meldte i går, er den saka utsett til eit seinare møte i universitetsstyret. Derfor dreia diskusjonen seg i dag i hovudsak om prosjekt som skal bidra til å gjenoppbyggja forskings- og utdanningssektoren i Palestina.
Les i Uniforum: UiO-styret: Den varsla gjennomgangen av ansvaret for Israel-avtalar er utsett
UiO støttar norsk hjelpeprosjekt
Rektor Ragnhild Hennum opna orienteringa om kva tiltak UiO har sett i verk for Palestina, med å informera om at UiO også er med i Norsk konsortium for palestinsk høgare utdanning (NorPal) som formelt starta opp 1. januar i år.
Initiativet til konsortiet blei tatt av OsloMet og Studentane og akademikarane sitt internasjonale hjelpefond (SAIH) i mai i fjor. No er over 18 universitet og høgskular blitt med i tillegg til Norsk studentorganisasjon, opplyste viserektor for utdanning Berit Karseth på møtet i universitetsstyret i dag.
– Det må forankrast i våre styre og organisasjonar. Me går inn med 300 000 kroner i dette konsortiet. Det er med på å skaffa pengar frå Norad og andre til ulike prosjekt, fortalde Karseth til styret.
Ho opplyste også at NorPal skal ha ein workshop den 26. februar i Oslo for å bringa saman norske fagmiljø som ynskjer å bidra. Søknadsfristen vil vera den 26. mars.
– Oppløftande og krevjande prosjekt
Ekstern styrepresepresent Sturla Henriksen syntest det var veldig bra at UiO har slike initiativ. Samtidig lurte han på korleis det er koordinert med andre universitet.
– Alle kan vera med i NorPol, akkurat som i Scholars at Risk, svarte rektor Ragnhild Hennum.
Også ekstern styrerepresentant Berit Reiss-Andersen var fornøgd med å få eit slikt oversyn på universitetsstyrets bord.
– Det er oppløftande og krevjande prosjekt. Bidrag til gjenoppbygging av utdanning og forsking er ein viktig faktor, understreka ho.
Samtidig hadde ho lagt merke til at det var stor struktur her heime og få resultat der ute.
– Det er viktig å vera innovativ og kunna driva fjernundervisning og andre prosjekt som i Amman. Det er bra for omdømmet, syntest ho.
Då viste ho til prosjektet som UiO-initiativet Global University Academy har starta opp i ein flyktningleir for palestinarar i Jordans hovudstad Amman. Reiss-Andersen lurte også på kvifor det er så vanskeleg å få opphaldsløvye for dei få som har kome gjennom nålauget. Ho fekk svar frå rektor Ragnhild Hennum.
– Det er moglegheitene for retur som er grunnen. Me må forklara korleis føresetnadene for retur er, sa ho.
Betre psykisk helsetilbod frå SiO
For representanten for dei mellombels vitskaplege tilsette Emma Joanna Lengle var det viktig å få svar på om kva psykisk helsetilbod dei palestinarane som kjem, får frå Studentsamskipnaden i Oslo (SiO).
Fungerande universitetsdirektør Johannes Falk Paulsen kom med eit kort svar.
– Det er generelt betre for alle. Gruppesamtalar fungerer, slo han fast.
Representanten for dei teknisk-administrative tilsette Anne Kolberg Buverud jobbar til dagleg i Seksjon for forsking og internasjonalt samarbeid i hovudadministrasjonen til UiO. Ho kunne konstatera at det ikkje alltid er like lett å få plassert dei forfylgde studentane som kjem til UiO gjennom Students at Risk-ordninga.
– Alle som søkjer gjennom Students at Risk prøver å finna eit studium som liknar det dei kjem frå. Det kan ofte vera vanskeleg å få det til, sa ho.
– Må vera innovative
Emma Joanna Lengle som er universitetslektor på Det medisinske fakultetet kom med masse skryt over sitt eige fakultet fordi det hausten 2024 tok imot ti palestinske studentar som kunne ta eit semester av studiet sitt der.
– Me må vera innovative. Er det andre liknande moglegheiter? lurte ho på.
Hennum svarte at det ikkje var lett å få til.
– Students at Risk og Scholars at Risk kan hjelpa enkeltpersonar, men ikkje store grupper av personar. Unntaket er studentane som kom til Det medisinske fakultetet, peika ho på.
For Emma Joanna Lengle var det fint at UiO kan hjelpa palestinarar både på Gaza og i andre palestinske område.
– UiO bør vera med på å bidra til å gjenoppbyggja forskings- og undervisningssektoren i Palestina. Det er viktig.
UiO-rektor Ragnhild Hennum viste til at UiO også har prosjekt på universitet andre stader i Palestina.
– Me er aktivt inne i Birzeit universitet, understreka ho.
Les mer i Uniforum
Farmasibygningen rehabiliteres for 265 millioner
UiO-styret: Den varsla juridiske gjennomgangen av ansvaret for Israel-avtalar er utsett
Logg inn for å kommentere