Regjeringa fornya støtta til det globale sør

No kan norske fagmiljø søke om støtte til akademisk samarbeid og studentmobilitet med universitet og høgskular i det globale sør. Kvart prosjekt kan få inntil fem millionar kroner i støtte. – Gjensidig akademisk samarbeid med miljø i det globale sør er viktig for å utvikle ny kunnskap i møte med store samfunnsutfordringar som global helse, berekraft, migrasjon, demokrati og menneskerettar. No får fleire høve til å samarbeide om kunnskapsutvikling på tvers av fagmiljø i Noreg og partnarlanda, og studentar kan få relevant internasjonal erfaring og kompetanse, seier forskings- og høgare utdanningsminister Oddmund Hoel i ei pressemelding frå Kunnskapsdepartementet. Det er Direktoratet for høgare utdanning og kompetanse (HK-dir) som lyser ut midlar i ordninga NORPART. Budsjettet er på 35 millionar kroner årleg, for perioden 2024 til 2028, med atterhald om årleg godkjenning av Stortinget.