– Vi treng ein heilskapleg digitaliseringspolitikk på tvers av ulike sektorar for å legge til rette for arbeidsplassar, verdiskaping og betre offentlege tenester i heile landet. Derfor startar vi no arbeidet med ein ny nasjonal digitaliseringsstrategi, seier kommunal- og distriktsminister Sigbjørn Gjelsvik (Sp) i ei pressemelding.
Strategien skal mellom anna stake ut kursen for vidare digitalisering av offentleg sektor, legge betre til rette for næringsretta digitalisering og ta opp viktige samfunnsspørsmål, som behov for betre regulering av nye teknologiar – til dømes kunstig intelligens - og forholdet til tech-gigantene. Målet er sterkare samordning og utvikling av ein heilskapleg politikk som går på tvers av offentleg og privat sektor.
– Vi lever i ei verd der den teknologiske utviklinga skjer i rekordfart. Det ser vi særleg knytt til bruken av kunstig intelligens. Denne teknologien har potensial for å løyse samfunnsutfordringar og auke velferda. Samtidig fører utviklinga med seg store utfordringar seier statsminister Jonas Gahr Støre i den same pressemeldinga.
Aktuelle tema i strategien er digital infrastruktur, politikk for personvern, digital tryggleik og beredskap, verdiskaping med data, tilgang på digital kompetanse, behov for forsking på digitalisering, tiltak for næringsretta digitalisering, nye teknlogireguleringar frå EU og auka inkludering i det digitale samfunnet.
Den nasjonale digitaliseringsstrategien skal etter planen vere klar i løpet av første halvår 2024.
Logg inn for å kommentere