UiO vil reisa bygning for gjesteforskarar langs Blindern stasjon

Tanken er at Blindern stasjon skal bli Blindernporten og gi både studentar og forskarar eit godt førsteinntrykk av Universitetet i Oslo.

– I dag er ikkje Blindern stasjon særleg tiltalande med svære og dominerande gangbruer, synest eigedomsdirektør John Skogen. Det er noko han ynskjer å gjera noko med. – UiO vil derfor ta kontakt med Oslo Sporveier og Oslo kommune for å høyra om me kan få til noko i fellesskap, slår han fast.  Også i 1999 ville UiO gjera stygg stasjon skjønn. Den gongen var det dåverande rektor Kaare R. Norum som ynskte det.

   Les i Uniforum: Stygg stasjon blir skjønn?

                             Blindern stasjon forblir som den er ...

Ynskjer alle internasjonale forskarar i ein felles bygning

Ein ny idé er likevel komen heilt til utgreiingsstadiet. – Ja, den handlar om korleis me kan få samla alle bustader for internasjonale forskar i eit felles bygg langs Blindern T-banestasjon. I dag har me litt over 40 forskarbustader spreidde på ulike stader. Det er ikkje særleg driftsvennleg. Me håpar å selja desse gjesteforskarbustadene og husa alle gjesteforskarane i ein felles bygning som altså kan byggjast der Parkavdelinga held til i dag og på tomta der det tidlegare var ein kiosk. UiO eig den eine tomta, medan Studentsamskipnaden i Oslo eig den andre. Nettopp difor hadde det vore fint om me kunne ha bygt ein bygning der me kunne samla alle bustadene for internasjonale forskarar, understrekar han. 

   Les i Uniforum: Blindern stasjon blir ny i 2011

– Eit fortrinn for UiO

Då han la fram tanken for universitetsstyret før jul, fekk han gode tilbakemeldingar. John Skogen trur det vil vera ein stor fordel for Universitetet i Oslo. – Det vil vera eit stor fortrinn for UiO i konkurransen om å trekkja til seg dei største internasjonale forskartalenta, trur John Skogen. Han har allereie vore i kontakt med direktør Lisbeth Dyrberg i SiO, og dei har blitt einige om å lysa ut ein avgrensa arkitektkonkurranse i løpet av nyåret. Og det stadfestar Lisbeth Dyrberg.

– Arkitektkonkurransen vil vera grunnlag for ein reguleringsprosess, før forslaget skal gjennom ein bygnings- og planleggingsprosess og til slutt kjem til politisk behandling i Rådhuset, understrekar ho.

– Verdig tilgangsportal

Studentsamskipnaden i Oslo og Akershus har tru på prosjektet.

– Her har UiO og SiO eit felles prosjekt for å regulera dette området til ein bygning med bustader for internasjonale forskarar, noko som det er eit stort behov for. Det felles ynsket vårt er å gjera stasjonsområdet på Blindern slik at det blir ein verdig tilgangsportal til Universitetet i Oslo, seier Lisbeth Dyrberg til Uniforum. Det er likevel langt fram før stasjonsområdet vil kunna visa seg frå ei heilt ny side.

– Me må først ha ein strategi for å kunna realisera ambisjonane våre for dette området, legg ho til.

– Tar lang tid

Så langt er det ikkje mogleg å seia kva prosjektet vil kosta.

– Sidan det førebels berre er eit luftslott, kan me ikkje kalkulera kor mykje det kjem til å kosta. Men å flytta Parkavdelinga vil ikkje vera vanskeleg, for me har mange andre stader på Blindern som dei kan flytta til. Førebels er utgreiinga i fase 1, og det tar lang tid før me kjem over til ein gjennomføringsfase, understrekar John Skogen.

Eigedomsdirektøren viser også til at saka truleg må tilbake til handsaming i universitetsstyret. – Ja, dersom me kjem fram til at det vil vera forsvarleg å selja dagens gjesteforskarbustader for å kunna finansiera kostnadene ved å byggja ei felles blokk for alle desse gjesteforskarbustadene, vil universitetsstyret få det siste ordet i saka, konstaterer han.

Uniforum har også forsøkt å få ein kommentar frå leiinga i Oslo Sporveier til desse planane. Så langt har det ikkje lykkast oss å få dei i tale.