Rår Noreg til å delta i EUs nye giga-satsingar

Forskingsrådet tilrår full norsk tilknyting til EUs nye rammeprogram for forsking og innovasjon og til det nye fondet for styrking av konkurranseevna.

VIL LØNNA SEG: – Med god nasjonal koordinering og eit godt dimensjonert apparat, vil verdien av deltakinga langt overstiga kostnadene, seier Gunnar Bovim, styreleiar i Forskingsrådet.

Foto: Tore Oksholen/ Universitetsavisa

– Norsk assosiering til nytt rammeprogram og heile konkurranseevnefondet er avgjerande for å sikra Noregs posisjon som ein relevant aktør i europeisk og global forsking, innovasjon og industriutvikling. Konkurranseevnefondet vil også vera eit kraftfullt instrument for å løysa globale samfunnsutfordringar, seier styreleiar i Forskingsrådet Gunnar Bovim i ei melding på nettsidene til NFR.

Det er styret i Forskingsrådet som no tilrår at Noreg knyter seg til både EUs nye rammeprogram for forsking og innovasjon, Horisont Europa 2028–2034 og eit nytt konkurranseevnefond.

– Med god nasjonal koordinering og eit godt dimensjonert apparat, vil verdien av deltakinga langt overstiga kostnadene, seier Gunnar Bovim.

Kopling mellom forsking, innovasjon og kommersialisering

Det foreslåtte konkurranseevnefondet skal omfatte fleire program, blant dei Horisont Europa. Ved å leggja større vekt på koplinga mellom forsking, innovasjon og kommersialisering, er formålet med konkurranseevnefondet å byggja konkurransekraft i strategisk viktige sektorar for Europa, går det fram av meldinga på Forskingsrådets nettsider.

Det nye Konkurranseevnefondet og Horisont Europa skal ha like prioriteringar:  

Rein omstilling og industriell avkarbonisering   
Helse, bioteknologi, landbruk og bioøkonomi   
Digitalt leiarskap   
Motstandsevne, tryggleik, forsvarsindustri og romindustri

Blir nesten dobbelt så stor

Europakommisjonen foreslår å nesten dobla budsjettet for det nye Horisont Europa, frå 93,5 milliardar euro for noverande rammeprogram, til 175 milliardar euro. Konkurranseevnefondet får eit foreslått budsjett på 451 milliardar euro, inkludert rammeprogrammet for forsking.

Noreg deltar allereie i dei fleste eksisterande EU-program og EU-initiativ som vil bli vidareførte i konkurranseevnefondet. Også for dei delane av konkurranseevnefondet som ligg utanfor Horisont Europa, blir det foreslått kraftig vekst i budsjetta. Det inkluderer mellom anna ei stor satsing på tryggleik, beredskap og forsvarsevne, står det i meldinga frå Forskingsrådet.