13 000 personar deltok på møte i Domus Bibliotheca i 2024

I 2024 deltok i gjennomsnitt 74 personar på kvart av dei 174 arrangementa på Domus Bibliotheca i sentrum. Det viser tal Uniforum har fått frå UiO.

DEBATTARENA: I oktober var Scene Domus Bibliotheca arena for tiårsjublileet for Students at Risk i Noreg. Då deltok blant andre Sveinung Skule, og Hilde Kramer frå HK-Dir, UiO-rektor Svein Stølen og utanriksminister Espen Barth Eide.

Foto: Ola Gamst Sæther

Til saman 13 000 personar tok turen innom dei 174 arrangementa i Domus Bibliotheca i fjor.

Med det besøkstalet plasserer Domus Bibliotheca seg langt framfor den andre store debattarenaen på UiO, Scene HumSam. Men der har det berre vore 46 arrangement som til saman har samla 4058 personar. Gjennomsnittsbesøket blir dermed på 86 personar, tolv personar høgare enn det Scene Domus Bibliotheca kan visa til. Då har ikkje UiO rekna med mindre arrangement som til dømes språkkafeen.

VIKTIG DEBATTARENA: Også Scene HumSam i Georg Sverdrups hus var ein viktig debattarena i 2024. Her diskuterer professorane Scott Gates og Jens Jungblut det moglege utfallet av presidentvalet i USA 4. november i fjor. (Foto: Ola Gamst Sæther)

Uniforum har også fått besøkstala for Open Aula på laurdagar og sommaropen Aula. For ein laurdag i månaden er det Open Aula for dei som vil sjå både aula-måleria til Edvard Munch og få eit inntrykk av heile aulaen. I 2024 nytta 3280 personar seg av det tilbodet. I sommar var det også ope i Aulaen 15 vekedagar i juli og august. 5400 nytta seg av det tilbodet, viser tala Uniforum har fått frå Avdeling for kommunikasjon og samfunnskontakt ved UiO.