UiO klimagassutslepp frå tenestereiser med fly har gått ned sidan 2018, men no går det feil veg

Klimagassutslepp frå tenestereiser med fly auka med 5 prosent frå 2022 til og med 2023, men har likevel gått ned med 31 prosent sidan 2018. Det viser UiOs klimagassrekneskap for 2023. På tysdag kjem det opp som informasjonssak i Universitetsstyret.

AUKAR: Utslepp frå tenestereiser med fly har auka det siste året, viser UiOs klimagassrekneskap.

Foto: Yngve Vogt

Klimagassrekneskapen er blitt presentert for Universitetsstyret sidan 2018. Og sidan det året har klimagassutsleppa ved UiO gått ned med 18 prosent, rundt 17 000 tonn CO2 kvart år frå 2018 til og med 2023, går det fram av klimarekneskapen for 2023.

UiO ligg bak målet

Målet til regjeringa og til UiO er at utsleppa skal reduserast med 50 prosent i 2030, med 2018 som grunnlag. For å få det til burde reduksjonane ha vore på 19 000 tonn CO2 i åra frå 2018 til og med 2023. Det vil seia at UiO i dag ser ut til å liggja bak dette målet, går det fram i saksdokumenta universitetsdirektør Arne Benjaminsen og eigedomsdirektør John Skogen har laga til Universitetsstyret.

Det som er mest positivt med rapporten, er at den dokumenterer at klimagassutslepp frå UiOs flyreiser er gått ned med 31 prosent frå 2018 til og med 2023. Det som likevel er tankevekkjande er at det siste året auka klimagassutsleppet frå tenestereiser med fly med 5 prosent. Og det er talet på flyreiser målt i personkilometer som utgjer den største skilnaden, står det i rapporten som skal leggjast fram for styret i morgon.

Færre rehabiliteringsprosjekt reduserer utsleppa

Der går det også fram at det totale klimagassutsleppet frå UiO mellom 2022 og 2023 er blitt redusert med 8 prosent. Den viktigaste grunnen til det, peikar rapporten på, er at det har vore langt færre rehabiliteringsprosjekt det siste året enn tidlegare. På dette området trekkjer dei to UiO-direktørane fram at dette har både ei positiv og ei negativ side. For medan rehabiliteringsprosjekta står på, vil klimagassutsleppa auka. Når dei er ferdige, vil det bli mindre utslepp på grunn av energisparing.

Tenestereiser utgjer 20 prosent av samla utslepp i 2023

Samla syner tala at klimagassutsleppa frå tenestereiser utgjer 20 prosent av det samla klimagassutsleppet frå UiO i 2023. Utsleppa frå dei som UiO kjøper varer fr,å er på eit stabilt høgt nivå, også fordi UiOs eigne klimautslepp blir redusert. Innkjøpt energi auka klimagassutsleppa med 4 prosent i 2023 samanlikna med året før. Grunnen til det var den auka energibruken på grunn av ein kald vinter, går det fram av rapporten.

Målet er at det skal vera ein reduksjon i energibruken på 30 prosent i alle bygg i 2030, står det i saksomtalen. Sjølv om den blei redusert med 16 millionar kWh frå 2018 til 2023, må det setjast i verk omfattande tiltak for at målet skal kunna nåast, er konklusjonen.

To direktørtilsetjingar

Universitetsstyret skal også tilsetja direktør for Berekraftshuset. Blant kandidatane er både professor ved Senter for utvikling og miljø Benedicte Bull, professor i kulturhistorie Helge Jordheim og Jemima Garcia- Godos, professor ved Institutt for sosiologi og samfunnsgeografi. Styret skal også tilsetja direktør for Naturhistorisk museum. Dagens direktør Brit Lisa Skjelkvåle er mellom søkjarane og får truleg halda fram i ein ny periode.

Styret skal også vedta ein ny politikk for immaterielle verdiar på UiO, altså ein IPR-politikk. Den skal setja mål og rammer for overtaking av arbeidsresultat med kommersielt potensial. Forslaget går ut på at Universitetsstyret også gir universitetsdirektøren fullmakt til å vedta retningslinjer for forvaltninga av IPR.

Deler ut frå Universitetsstyrets reserve

I tillegg skal styret fordela pengar frå Universitetsstyrets reserve. Her går mesteparten av potten dvs. 18,1 millionar kroner til kompensasjon for valutasvingingar på mediekjøp i 2024. Dette er utgifter som Universitetsbiblioteket har hatt og som det no får kompensert for.

Den siste biten på 9,6 millionar kroner går til betaling av Naturhistorisk museums del av eit samla momskrav til UiO på 59 millionar for rehabiliteringa av Brøggers hus.

Universitetsstyret gjer endeleg vedtak i denne saka.

Ei anna sak som UiO-styret får på bordet, er Internrevisjonens årsplan for 2025. I den går det fram at dei skal sjå nærare på universell utforming, studiegjennomføring, innføring av KI-forordninga og mottak i Vikingtidsmuseet. Den har også sett opp Senter for menneskerettar på årsplanen sin for 2025. Forslaget til Universitetsstyret er at det vedtar årsplanen.

Dette er heile sakslista til møtet i Universitetsstyret 3. desember:

Møte nr. 7/2024 i universitetsstyret

Møtet vil bli streamet

Tid og sted: 3. des. 2024 10:00 – 14:30, Professorboligen , Karl Johansgate 47

Legg til i kalender

Saker til behandling i lukket møte

Ordinære saker

V-sak 57-24 Godkjenning av dagsorden og habilitet

Forslag til vedtak:

Dagsorden og habilitet ble godkjent.