Oslo-ordførar Marianne Borgen opna ny gang- og sykkelbru ved Livsvitskapsbygget

Både direktør Carl Henrik Gørbitz i UiO:Livsvitskap, prosjektleiar for Livsvitskapsbygget, Per Roger Johansen i Statsbygg og seksjonssjef Øystein Tandberg i Statens vegvesen var på plass då ordførar Marianne Borgen skulle opna den nye gang- og sykkelvegbrua melllom Domus Athletica og Gaustadalleen i dag. 

Brua har kosta 95 millionar kroner, får Uniforum opplyst hos prosjektleiar for gang- og sykkelbrua, Hedvig Skappel hos Statsbygg. Brua vil gjera det mykje tryggare for syklistar og gåande å koma seg fram mellom Ring 3 og Livsvitskapsbygget. Den nye strekninga er 172 meter lang, og den er sju og ein halv meter brei .

Brukte eitt år på brua

Og det var prosjektleiar for bygginga av Livsvitskapsbygget., Per Roger Johansen som tok ordet først før brua skulla opnast.

– Arbeidet tok til for eitt år sidan like etter Russlands invasjon av Ukraina. Trass i den utfordringa den krigen har gitt oss både når det gjeld råvaremangel og høge prisar, har me klart å byggja både som planlagt og som budsjettert og utan skader under arbeidet, slo han fast.

Han la heller ikkje skjul på at det hadde vore ein del vanskar med mellombelse gang- og sykkelvegar i området, og dei utfordringane det hadde ført til  for syklande og gåande. 

– Det stadfesta behovet for denne sykkelbrua, sa han.

– Dette er ein gledens dag

Så overdrog han formelt ansvaret for brua til Statens vegvesen og seksjonssjef Øystein Tandberg. 

– Dette er ein gledens dag. Me står no ved ei bru som oppfyller alle krav til ein moderne og effektiv gang- og sykkelveg.

Brua er  altså 172 meter lang og sju og ein halv meter brei.

  – Og det er heilt nødvendig når 20 prosent av persontrafikken i  Oslo skal utgjerast av syklistar og gåande, sa Øystein Tandberg.

Han lova også at dette berre var byrjinga. 

– Planen er å laga ein samanhengjande høg standard gang- og sykkelveg frå Ullevaal stadion og hitover og heilt til Smestadkrysset, fortalde han. 

– Veldig glad for at brua er så brei

Og Oslo-ordførar Marianne Borgen var svært begeistra.

 – Oslo tar mål av seg til å bli verdas første utsleppsfrie by. Då må me få endå fleire folk over på kollektivtrafikk, fleire må sykla og fleire må gå. Og eg er veldig glad for at brua er så brei, vedgjekk ho. 

Så forklarte ordføraren nærmare kvifor. 

– Det er mange forskjellige typar syklistar i Oslo. Det er nokon som trenar, det er nokon som kjører kjempefort, og det er nokon som er i kategorien min som er damer med korg. Og me som er damer med korg, treng at det  er breie trasear, for då er det plass til alle typar syklistar, konstaterte Marianne Borgen.

– Gratulerer med dagen og ei flott bru!

Ho tykte også at det var flott at det var ein så fin og avslepen trasé. 

– Det er fint for alle, anten dei brukar rullatorar, kjem med barnevogner eller berre går. Dette er ein stor dag for Oslo, og så er det viktig å visa at når me byggjer nytt i byen, så må det også vera lett og trygt å koma seg fram. Gratulerer med dagen og med ei fantastisk bru,  sa ho til representantar for Statsbygg, Staten vegvesen, Oslo kommue og Universitetet i  Oslo, og alle andre frammøtte.

Så bad ho folk om å telja ned frå fem, og på 1 klipte ho over snora og erklærte brua for opna. 

Då kunne direktør Carl Henrik Gørbitz i UiO: Livsvitskap, UiOs prosjektkoordinator for Livsvitskapsbygget Gunnar Dick på UiO og dei andre i fullt sykkelutstyr, sykla over brua for første gong. Like etter kom dei gåande og ein far med barn i barnevogn. Dei som blei igjen fekk full servering av boller og kaffi. Blant dei var ordførar Marianne Borgen.