No gler Svein Stølen seg til å få studentane tilbake

Det var på regjeringa sin pressekonferanse klokka 18.00 i ettermiddag forskings- og høgare utdanningsminister Henrik Asheim kunngjorde at studentar som hadde behov for tilgang til lokale for å halda seg á jour med studia sine, kan venda tilbake frå måndag 11. mai. 

Sjølv rekna han med at det vil dreia seg om mellom 25 og 30 prosent av alle studentane.

– Dette var det me hadde håpa ville skje, seier UiO-rektor Svein Stølen til Uniform, like etter at regjeringa har avslørt gladnyhendet.

– Eg reknar med at det blir ein hektisk planleggingsdag på Universitetet i Oslo i morgon, varslar han. 

– Opnar først opp for masterstudentane

For det som er sikkert er at ikkje alle studentane kan koma til universitetet samtidig på måndag.

 – Nei, først må me sørgja for at det er tilsette i alle bygningane.  Deretter vil me opna opp for masterstudentane. Rimeleg raskt vil studentane koma på plass, i alle fall frå måndag 18. mai, seier Svein Stølen. 

Han er heilt sikker på at mange studentar har behov for å treffa andre studentar igjen.

– Ikkje minst blir det viktig for dei igjen å kunna samlast i kollokviegrupper, sjølvsagt med minst ein meter avstand mellom dei.  

– Fakulteta får ansvaret for å opna bygningane

Stølen har også tru på at også andre aktivitetar kan startast igjen.

 – Ja, det må opnast opp både for pasientkontakt og for laboratorieforsøk for dei som det er aktuelt for, legg han vekt på.  

I hovudsak vil han delegera ansvaret for å opna universitetsbygningane og gi tilgang til studentar og tilsette, til fakulteta. 

– Det vil vera ulike prioriteringar frå fakultet til fakultet og frå institutt til institutt.

Også tilsette kan venda tilbake

–Vil dette seia at dei teknisk-administrative og dei vitskaplege tilsette kan koma tilbake på jobb frå måndag?

– Dei som synest dei gjer ein like god jobb for jobben heime som på kontoret, kan sjølvsagt halda fram med det. Men dei som vil begynna å jobba på kontoret igjen, kan også gjera det. Men det vil sjølvsagt vera ulike reglar for dei som sit i opne landskap og dei som har eigne kontor, understrekar han. Me må framleis tenkja smittervern, understrekar Svein Stølen.