Kyrre Lekve:– Noreg må etablera nasjonale forskingslaboratorium

– Nasjonale forskingslaboratorium kan styrkja kvaliteten på norsk forsking. Det trur Kyrre Lekve, som er nestleiar for forskingsinstituttet Simula.

NY MODELL: – Dagens instituttsektor må omdannast til fire, fem nasjonale forskingslaboratorium, foreslår nestsjef Kyrre Lekve i Simula.

Foto: Ola Sæther

Det var på Høgre-konferansen om korleis framtidas forskingspolitikk skal utformast, at den tidlegare SV-statssekretæren og noverande nestleiar i Simula, Kyrre Lekve kom med det radikale forslaget sitt. Etter hans meining kan det gi ein betre bruk av forskingspengane.

– Utarma forskingsinstitutt

– I dag er forskinga i Noreg organisert innanfor universitets- og høgskulesektoren og forskingsinstitutta. I tillegg kjem Simula som har ein heilt eigen modell. Forskingsinstituttet  vårt er eigd av Kunnskapsdepartementet, og me driv utdanning av både masterstudentar og ph.d.-kandidatar. 

– No  tar universiteta den største delen av forskingsløyvingane og ynskjer å gjera alle prioriteringane sjølve, medan forskingsinstitutta blir meir og meir økonomisk utarma, meinte Kyrre Lekve.  

Ser til Austerrike

Etter å ha vore på studietur til seks land og besøkt 11 ulike forskingsorganisasjonar, har han kome fram til ein modell som han trur kan fungera i Noreg.

– I Austerrike etablerte styresmaktene i 2006 det nasjonale forskingslaboratoriet IST Austria (Institute of Science and Technology). Fram til 2026 skal den nyetablerte forskingsorganisasjonen få over 1000 tilsette. Den har rett til å tildela doktorgradar. Dei forskarane som blir rekrutterte dit, blir det på grunnlag av kvalitet og heilt uavhengig av fag, peika han på.

Samtidig viste Kyrre Lekve til dei nasjonale forskingslaboratoria i USA. 

– Der blir det satsa mange milliardar dollar på langsiktig forsking i forskingsfronten. Difor er USA den leiande forskingsnasjonen i verda, slo han fast. 

Kombinasjon av austerriksk og amerikansk modell

Etter hans meining kan ein kombinasjon av desse modellane også vera mogleg å innføra i Noreg.

– Simula er eit aksjeselskap som er eigd av staten ved Kunnskapsdepartementet, og som er heilt uavhengig av universitets- og høgskulesektoren. Me driv også utdanning av masterstudentar og ph.d.-kandidatar. Nasjonale forskingsinstitutt i Noreg må også bli endå meir internasjonalt orienterte, meinte han.

Ideen hans er at det kan etablerast 4 eller 5 nasjonale forskingslaboratorium i Noreg.

– Dagens instituttsektor må omdannast til slike nasjonale forskingslaboratorium. Dei må gradvis byggjast opp frå og med neste stortingsperiode og kan i stor grad byggja på satsingane i Langtidsplanen for forsking og høgare utdanning, sa Kyrre Lekve.

SFF i 15 år?

Administrerande direktør Arvid Hallén i Forskingsrådet lanserte eit anna forslag.

– Det ville vera betre for norsk forsking om me kunne ha utvida funksjonstida til dei beste sentra for framifrå forsking frå ti til 15 år. Me har gjort store framsteg i norsk forsking dei siste åra, men me er enno ikkje på heilt øvste nivå, sa han.

Etter hans meining er det ein viktig grunn til det.

– Det er for lita styring av forskingspengane. Dessutan sit universiteta med brorparten av løyvingane som går til forsking og utvikling, meinte han.

Men heller ikkje Forskingsrådet slapp unna kritikk.

Siri Hatlén, som er medlem av Produktivitetskommisjonen, tykte at organisasjonsforma er langt frå ideell.

– Samanlikna med andre land er Forskingsrådet organisert på ein heilt annan måte i Noreg. Det er både vedtakande og løyvande når det gjeld kva forskingsprosjekt som får pengar. Det er difor naudsynt å tenkja nye løysingar, var Siri Hatlén overtydd om.

Emneord: Internasjonalisering, Forskningspolitikk, Universitetspolitikk Av Martin Toft
Publisert 11. jan. 2016 12:31 - Sist endra 18. jan. 2016 16:35
Legg til kommentar

Logg inn for å kommentere

Ikkje UiO- eller Feide-brukar?
Opprett ein WebID-brukar for å kommentere