Studieplassar for UiO-studentar i utlandet står tomme

Det er ikkje berre Sophia-universitetet i Tokyo i Japan som ikkje får fylt opp studieplassane til studentar frå Universitetet i Oslo. Ei liste som Uniforum har fått frå

studieadministrasjonen ved UiO, viser at det finst ledige gratisplassar og betalingsplassar både på amerikanske og kanadiske prestisjeuniversitet og på universitet i Chile og Brasil. Heller ikkje i Australia, Sør-Korea og Storbritannia klarer studentar frå Universitetet i Oslo å fylla opp studieplassane som er øyremerkte for dei etter at vertsuniversiteta har inngått utvekslingsavtale med UiO. Sør-Afrika, India, Russland og Singapore er andre land der studieplassar står tomme. Organisasjonen University Studies Abroad Consortium (USAC) formidlar studieplassar frå universitet over heile verda og har 15 ubrukte plassar for UiO-studentar.

– Vil setja i gang tiltak

Ifylgje avdelingsleiar Guri Vestad i Seksjon for forskings-, utdanningsstøtte og internasjonalisering skal Universitetet i Oslo arbeida for å få fleire studentar til å dra ut.

– Me er i gang med å sjå på fleire tiltak for å få opp talet på utreisande studentar, då dette har stått stille i nokre år. Ved sida av alle plassane utanfor Europa gjeld denne underbruken av utvekslingsplassar også i Europa, gjennom Erasmus+ har me mange utvekslingsplassar ved gode, europeiske universitet, der ein ved sida av Lånekassefinansiering til og med får eige Erasmus-stipend.. Erasmus+-avtalane er alle eigde av fagmiljøa, det er også ein del av dei bilaterale avtalane, men der er nok dei fleste forankra sentralt, seier Guri Vestad.

– Opprådde for marknadsføringsidear

Ho har inga tru på at det er dårleg marknadsføring frå UiO si side som er grunnen til at så mange studieplassar står tomme:

– Me har gjennom fleire år og i samarbeid med fagmiljø og fakultet marknadsført utveksling gjennom websider: http://www.uio.no/studier/utveksling/ og informasjonsdagar, annonsar i Universitas, samarbeid med Studentparlamentet og fagutval, fotokonkurransar, bloggar og sosiale media. Inntil for berre eit par år sidan hadde me ein eigen skranke med rettleiing om studium i utlandet i Knutepunktet. Me er etter kvart blitt litt opprådde for fleire marknadsføringsidear, vedgår ho. UiO har likevel ikkje gitt opp.

– Men me er ganske overtydde om at betre integrering av utanlandsopphald i studieprogramma og klare tilrådingar frå dei som underviser og student-til-student-påverknad, er verkemiddel som ikkje er godt nok utnytta, og som me vil jobba endå meir med i tida framover, seier Guri Vestad.