Hyllar kjærleikens diktar

Han blei fødd i 1904 som Neftali Ricardo Reyes Basoalto, men var verdskjent som Pablo Neruda då han døydde i 1973. 100-årsjubileet for den chilenske nobelprisvinnaren i litteratur skal markerast med ein eigen Neruda-dag i Georg Sverdrups hus 18. november.

100 ÅR: Pablo Neruda blir hylla med diktopplesing og foredrag ein heil dag til ende på UB 18. november.(Foto: University of Chile)

Det er førstebibliotekar José Maria Izquierdo ved Bibliotek for humaniora og samfunnsvitskap og leiar for Norsk Hispanistforening i Noreg, som har tatt initiativet til å organisera ein eigen Pablo Neruda-dag ved Universitetet i Oslo. Også Spansklærarforeininga støttar arrangementet. Markeringa startar klokka 10 og vil var heilt fram til klokka 20. Forfattaren Kjartan Fløgstad skal halda eit innlegg som han har kalla for Latinamerikansk nærvere i norsk litteratur, medan førsteamanuensis Juan Pellicer ved Seksjon for spansk ved Klassisk og romansk institutt skal fortelja om Pablo Neruda som kjærleiksdiktar. På slutten av dagen skal Sosialistisk kor i Oslo framføra Pablo Nerudas storverk Canto General.

Neruda på fleire språk

- Likevel trur eg det mest spennande blir å høyra elevar frå dei vidaregåande skulane og studentar frå Universitetet i Oslo lesa Pablo Neruda på spansk, nynorsk og bokmål, urdu, fransk, tysk og tyrkisk, seier Izquierdo, som opphaveleg kjem frå Valencia i Spania.

- Heile det spanske folket står i stor gjeld til Pablo Neruda fordi han under Den spanske borgarkrigen klarte å redda livet til mange republikanarar som var på flukt frå Francisco Franco ved å senda dei med båt til Chile. Difor føler eg at er med på å gi litt igjen ved å organisera ein eigen Pablo Neruda-dag ved UiO, fortel Izquierdo. Men det er dei faglege grunnane som er den viktigaste årsaka til at Neruda skal markerast.

- Dette blir eit fint høve for oss som har spansk som morsmål å visa fram ein del av kulturarven vår. Slik kan me demonstrera at spansk ikkje berre er eit turistspråk, men derimot eit språk som har spela ei stor rolle både i verdshistoria og i verdslitteraturen. Når me skipar til ein eigen dag om Pablo Neruda, kan me både visa fram diktinga til ein av av verdas største poetar, samtidig som me kan slå eit slag for morsmålet og kulturen vår, understrekar han.

Dikta om kjærleiken

Pablo Neruda blei tildelt Nobels litteraturpris i 1971, og den mest kjente diktsamlinga hans er truleg Tjue dikt om kjærleik og ein song om desperasjon (Veinte poemas de amor y una cancion desesperada, 1924). Mange av dikta hans frå Den spanske borgarkrigen er kjende som nokon av dei mest dramatiske og tragiske dikta som nokon gong er skrivne i verdslitteraturen. Men det er som kjærleiksdiktar dei fleste elskar Pablo Neruda.

- Heile min generasjon er blitt forelska i dikta hans og har brukt dikta hans når me har vore forelska. Då eg var 16 år prøvde eg å vinna hjartet til ei jente ved å lesa dikt av Pablo Neruda til henne. Det lykkast eg med. Då forholdet gjekk over styr ei stund seinare brukte eg eit annan dikt av Neruda for å uttrykkja kor trist eg var, smiler José Maria Izquierdo.

Storebror

- Og for oss som vaks opp under nasjonalkatolisismen til Franco der alt som hadde med kropp og seksualitet å gjera var tabu, fungerte Pablo Neruda også som ein storebror som gav oss råd om kjærleiken, legg han til. No håpar han at folk får augene opp for at spansk og spansk-amerikansk kultur er noko meir enn kvite strender, solbrende turistar, statskupp og politisk korrupsjon.

- Pablo Neruda kan fungera som ein inngangsport til den store spanske og spansk-amerikanske litteraturen for dei som til no berre har vore oppteken av den anglosaksiske litteraturen. Dei vil få eit heilt anna bilete av Spania og Spansk-Amerika enn Hollywood-versjonen, lovar José Maria Izquierdo.

Emneord: Internasjonalisering, Latin-Amerika, Litteratur (skjønn-) og forfattere Av Martin Toft
Publisert 3. nov. 2003 17:12 - Sist endra 10. des. 2008 15:13
Legg til kommentar

Logg inn for å kommentere

Ikkje UiO- eller Feide-brukar?
Opprett ein WebID-brukar for å kommentere