Dæhlen leiar styret for nyskapingssenter

Det var den 6. mai 2003 styret ved UiO gjorde eit prinsippvedtak om å oppretta eit University Technology Office ved UiO. Selskapet skal administrera og letta nyskapingsarbeidet og arbeidet med patentrettar for forskarane. Selskapet skal vera eit heileigd dotterselskap av UiO under Unirand AS. No har altså rektor Arild Underdal oppnemnt Morten Dæhlen til leiar for interimsstyret for selskapet. Han får med seg professor Kjetil Taskén ved Det medisinske fakultetet, dagleg leiar Tove Kristin Karlsen, Unirand AS, avdelingsleiar Pål Rongved, Amersham Health AS, styreleiar Tellef Thorleifsson, Norsk Venturekapital forening/Northzone Venture og seniorforskar Mari Espelund, Genpoint AS/programstyret PROSBIO.

Interimsstyret har fått i oppgåve å førebu etableringa av eit UiO Technology Transfer Office (UiO TTO). Men interimsstyret skal også utarbeida forslag til vedtekter, stiftingsdokument, samarbeidsavtalar og budsjett for UiO TTO. I tillegg skal det tilrå kven som skal tilsetjast som dagleg leiar for selskapet. Ei anna oppgåve blir å laga eit forslag til UiOs politikk for forskingsbasert nyskaping og etablera ein strategi for dette nyskapingsselskapet inkludert underliggjande selskap, og etablera samarbeid med forskingsmiljøa ved UiO. Det skal også tilrå ei lokalisering av UiO TTO. Interimsstyret skal rapportera til Unirand AS. Det vil førebels sitja frå 1. juni til 31. desember. Eit endeleg vedtak om å oppretta eit UiO TTO blir gjort av Universitetsstyret hausten 2003 etter innstilling frå interimsstyret.