Tone Lindheim ny direktør for Naturhistorisk museum

Tone Lindheim er i dag tilsett av styret på Universitetet i Oslo som ny direktør for Naturhistorisk museum( NHM).– Eit mål er å bidra til å auka "herlighetsverdiene" ved Naturhistorisk museum og Botanisk hage, seier den nytilsette direktøren til Uniforum.

BJØRLYKKES ETTERFYLGJAR: Tone Lindheim blei i dag tilsett som direktør for Naturhistorisk museum etter Arne Bjørlykke.

Tone Lindheim har bakgrunn som  professor i landskapsplanlegging ved Noregs miljø- og biovitskaplege universitet (NMBU), ho er landskapsarkitekt og dagleg leiar i Bjørbekk & Lindheim, melder Universitetet i Oslo i ei pressemelding.  – Naturhistorisk museum vil vera ein vesentleg brikke i det politiske vedtaket om Tøyenløftet. Dette gjeld både samlingane, forskinga, bygningane, så vel som hagen.  Botanisk hage med Tøyenparken vil kunna vera  det same for austkanten som Frognerparken er for vestkanten i dag, seier Tone Lindheim.

NHM er Noregs største naturvitskaplege samling med over sju millionar objekt i samlinga, og museet har forsking på  eit høgt internasjonalt nivå og formidling til breie grupper.

- Med Tone Lindheim får NHM ein sterk leiar som vil løfte museet i ein svært viktig periode. Museet har eit stort potensial og er ein nasjonal ressurs. NHM har store prosjekt med å modernisere utdaterte bygg og arbeider for å realisere det nye veksthuset som er under planlegging, seier rektor Ole Petter Ottersen.

Lindheim har lang erfaring frå store prosjekt og med å leia store tverrfaglige grupper, ved sidan av sitt vitskaplege arbeid.

- NHM ønskjer å vera ein viktig del av Tøyenløftet. Eg er trygg på at Tone Lindheim er ein  svært  dyktig fagperson som kan gjere museet til ein vital del av nye Tøyen.  Botanisk hage og museet er allereie av stor verdi for området. Med nytt veksthus, rehabiliterte bygningar og nye utstillingar kan museet formidle forsking av høg kvalitet til et breitt publikum, seier styreleiar ved NHM, Kristin Halvorsen.

Og Tone Lindheim sjølv er svært glad i museet og Botanisk hage.

– Det vil vera eit mål å bidra til å auka "herlighetsverdiene" ved Naturhistorisk museum og Botanisk hage. Det er allereie ein herleg oase midt i byen, men staden har kvalitetar som kan foredlast vidare, seier Tone Lindheim.  For henne er Naturhistorisk museum ein viktig læringsarena som appellerer til alle sansane.

Ho synest det er flott at Hersleb skole har eit nært samarbeid med museet. - Samtidig er det viktig å forsterka museet sin posisjon i heile byen og i resten av samfunnet ,seier Tone Lindheim.

Onsdag 3. desember  skal ho møta mannen ho skal overta etter, Arne Bjørlykke.

Les heile intervjuet med Tone Lindheim i papirutgåva av Uniforum 11. desember.

(Oppdatert kl. 23:26)

Emneord: Naturhistorisk museum, Universitetspolitikkk, Museene Av Martin Toft
Publisert 2. des. 2014 12:27 - Sist endra 2. des. 2014 23:26
Legg til kommentar

Logg inn for å kommentere

Ikkje UiO- eller Feide-brukar?
Opprett ein WebID-brukar for å kommentere