På slaget klokka 8.00 begynte 50 barn i femårsalderen å syngja ”Hurra for deg” til det 200 år gamle Universitetet i Oslo, representert i form av rektor Ole Petter Ottersen og universitetsdirektør Gunn-Elin Aa. Bjørneboe.
Fekk papirkrone på hovudet
Den som fyller år, får alltid på seg ei krone, og denne gongen var det rektor Ole Petter Ottersen som fekk på seg ei papirkrone som prikken over i-en, etter at han allereie hadde skride inn i foajeen i Georg Sverdrups hus med rektorkappe og rektorkjede.Barnesongen blei kringkasta direkte på Kulturnytt i NRK P2, og det blei også gjort fjernsynsopptak av framføringa.
– Vil aldri gløyma det
Etter at seansen var over, kvitterte UiO-rektor Ole Petter Ottersen med ein kort takketale til barna.
– Dette var den flottaste fødselsdagsgåva me kunne få. Eg vil aldri koma til å gløyma den dagen de kom for å syngja fødselsdagssongen på 200-årsdagen til Universitetet i Oslo. Som takk for framføringa skal de få tikroningen som blei laga til 200-årsjubileet til universitetet. Og så må det lova meg ikkje å bruka den til å kjøpa godteri for, sa Ottersen.
Bollar og saft
Så gav han universitetsdirektør Gunn-Elin Aa. Bjørneboe oppdraget med å dela ut tikroningar til barna frå ei korg som dei hadde tatt med seg. Etterpå blei det servert bollar og saft til barna utanfor Kafé Georg.
BOLLAR OG SAFT: Barna fekk bollar, saft og ein jubileumsmynt som honorar etter at dei hadde sunge fødselsdagssongen "Hurra for deg" for 200-årsjubilanten Universitetet i Oslo i dag tidleg. (Foto: Ola Sæther)
Logg inn for å kommentere
Ikkje UiO- eller Feide-brukar?
Opprett ein WebID-brukar for å kommentere