Kultur til IT-folket

Det er ei tildeling på 100 000 kroner frå Kulturdepartementet til UiO som har gjort det mogleg å senda Lunsj med kultur på turné rundt på forskjellige arbeidsplassar ved Universitetet i Oslo.

I dagens lunsj med kultur i Ole-Johan Dahls hus tok prosjektleiar Gjøril Songvoll sjølv over hovudrolla etter at songaren Anne Wiik Larsen måtte melda avbod. Dei som var til stades, fekk høyra O mio babbino caro  av Puccini, L'amour est un oiseaux rebelle frå operaen Carmen av Georges Bizet, men også smakebitar frå Czardasfyrstinna av den ungarske komponisten Emmerich Kálmán.

Dessutan spelte fiolinisten Karl  Espegard stykket Våren  av Edvard Grieg, akkompagnert av pianisten Monica Tomescu-Rohde. Musikarane akkompagnerte også Gøril Songvoll i songnummera hennar.

I kantina var det eit engasjert publikum, som kunne registrera at akustikken i lokalet var upåklageleg. I morgon er det tradisjonell Lunsj med kultur i Georg Sverdrups hus klokka 12.15. Då er det UiOs eldste studentorkester, Medicinsk Paradeorchæster som skal skapa humor og furore med musikken sin i foajeen i UiOs praktbygning på Blindern.