- Gratulerer med tilsettinga som fakultetsdirektør for UiOs
største fakultet, Anne Ma Eide!
- Tusen takk!
- Trur du dei tilsette på HF vil merka noko til at du no er
blitt fast tilsett?
- Eg har jo vore vikar her sidan november 2005 og har jobba
som nestleiar sidan sommaren 2003, så eg håpar i alle fall
dei tilsette er glade for at det var eg som blei tilsett.
- Lærte å setja grenser
- Kva annan yrkesbakgrunn har du?
- Den einaste jobben eg har hatt utanom universitetet, var
dei to åra eg arbeiddepå Ungdomskontoret til Oslo kommune.
Der lærte eg å setja grenser, og det har eg fått god bruk for
seinare i dei stillingane eg har hatt på UiO. Før eg kom til
Det humanistiske fakultetet arbeidde eg som kontorsjef ved
Pedagogisk forskingsinstitutt frå 1995, og eg blei med på
overgangen frå SV-fakultetet til det nye
utdanningsvitskaplege fakultetet i 1996. Endå tidlegare jobba
eg med økonomi- og personalsaker på Institutt for
statsvitskap.
- Kva visjonar har du for Det humanistiske fakultetet?
- For meg er det viktig at fakultetet held stillinga som
Noregs og Nordens beste humanistiske fakultet og som eitt av
dei beste i Europa. Difor er det svært gledeleg at me nyleg
også har fått tildelt vårt første senter for framifrå
forsking.
- Og kva blir det viktigaste arbeidet i tida framover?
- Arbeidet med fagprioriteringa blir den store saka.
Størstedelen av dette arbeidet vil gå føre seg på fakulteta.
Nettopp difor er me glade for at me aller først skal sjå på
utfordringane på forskingsområdet, slik at me kan få eit
bilete av kva me er verkeleg gode på. Deretter kjem turen til
andre ting på fakultetet.
- Trur uroa har lagt seg
- Det var stor uro på HF i samband med omorganiseringa i 2004
og den påfylgjande flyttinga. Er det framleis uro her?
- Eg trur den har lagt seg no. Når alt kjem til alt så trur
eg at omorganiseringa har ført med
seg mange gode synergieffektar. Det er sjølvsagt ei
utfordring å få så store institutt, men samtidig har me fått
ein meir profesjonalisert stab. Me har både fast tilsette
informasjonskonsulentar og forskingskonsulentar på kvart
institutt. Det hadde dei ikkje tidlegare. Når det no har gått
over to år sidan omorganiseringa blei sett i verk, skal me
setja i gang ei evaluering av kva som fungerer og kva som
ikkje fungerer. Me vil undersøkja kor tilfredse eller
utilfredse dei tilsette er med dei endringane me har vore
gjennom. Dessutan kjem me til å få masse å gjera i samband
med innføringa av elektronisk arkiv og elektronisk
fakturahandsaming.
- Inga ulempe med kvinneleg dekanat
- Dekanatet er berre sett saman av kvinner, og no får
fakultetet også ein kvinneleg fakultetsdirektør. Korleis vil
det gå?
- Eg trur ikkje det er ei ulempe at det er eit kvinneleg
dekanat. Og eg har aldri høyrt at det har vore eit problem
der heile fakultetsleiinga er sett saman av menn. Elles så
vil eg som fakultetsdirektør gjerne vera ein
diskusjonspartnar når politikken skal utformast, i tillegg
til at eg skal passa på at det forvaltingsmessige blir tatt
vare på. Med dagens dekanat vil det vera mogleg.
- Om det hadde blitt eit anna dekanat, ville det ha vore like
enkelt?
- Som fakultetsdirektør ville eg ha jobba med det dekanatet
som dei HF-tilsette hadde stemt på uansett. Det handlar om å
vera profesjonell. Resultatet av dekanvalet var ikkje
avgjerande for at eg søkte denne stillinga.
- Og kva politikk har du overfor studentane?
- Det viktigaste for oss blir å få studentane til å halda
fram med å studera på HF etter at dei har byrja å studera
her.
Logg inn for å kommentere
Ikkje UiO- eller Feide-brukar?
Opprett ein WebID-brukar for å kommentere