UiOs menneskerettspris til FNs spesialrapportør om vald mot kvinner

FNs spesialrapportør for vald mot kvinner, Radhika Coomaraswany frå Sri Lanka får tildelt Universitetet i Oslos menneskerettspris, Lisl og Leo Eitingers pris for år 2000. Det har Kollegiet bestemt.

Grunngjevinga for å gi henne denne prisen er den banebrytande innsatsen ho har gjort for å dokumentera vald mot kvinner over heile verda og skapt verdsomfattande merksemd om dette problemet. I tillegg har ho klart å få problemet med vald mot kvinner inn i statuttane til Den internasjonale kriminaldomstolen og anerkjent som brotsverk mot alle menneske.

Ho har også gått i bresjen for å koma fram til juridiske og konstitusjonelle løysingar på konfliktar som har å gjera med minoritetar eller etniske grupper. Dessutan leiar ho the International Centre for Ethnic Studies i Sri Lankas hovudstad Colombo. Dette er Asias leiande akademiske senter for etniske studiar. Prisen som er på 10 000 kroner, blei delt ut under ei tilskiping i Universitetets gamle festsal, Urbygningen tysdag 28. november.

Emneord: Priser
Publisert 27. nov. 2000 10:38 - Sist endra 10. des. 2008 16:06
Legg til kommentar

Logg inn for å kommentere

Ikkje UiO- eller Feide-brukar?
Opprett ein WebID-brukar for å kommentere